EKONOMI

Bankat nxjerrin jashtë vendit 500 milionë euro në 6 muaj

08:10 - 21.04.17 gsh.al
GSH APP Download on Apple Store Get it on Google Play

 




 

Ornela MANJANI

 

Kredia e dhënë për subjektet jashtë vendit ka arritur në 67 miliardë lekë, ose rreth 500 milionë euro. Ekspertët e bankës pohojnë se nuk ka kufizime sasiore për këtë lloj kredie, ndërsa ajo ponderohet me një normë më të lartë rreziku. Të dhënat janë bërë të ditura nga Banka e Shqipërisë, në Raportin e Stabilitetit Financiar për 6-mujorin e dytë të vitit 2016.

Sipas Bankës së Shqipërisë, kredia që jepet jashtë vendit ka vijuar të jetë e lartë. Sektori bankar ka zgjeruar pozicionin kreditor në subjektet jorezidente. Në dhjetor 2016, aktivet me jo rezidentët përbëjnë 27% të totalit të aktiveve, ndërsa detyrimet përbëjnë 6% të tyre. Si rrjedhojë, pozicioni neto kreditor është zgjeruar me rreth 11% në terma gjashtëmujorë dhe rreth 19% në terma vjetorë, duke arritur në nivelin 293 miliardë lekë. “Rreziku nga ekonomia e brendshme vijon të jetë i lartë, sipas matricës së publikuar nga Banka e Shqipërisë.

Nga ana tjetër, bankat mëmë mund të kenë reduktim të veprimtarisë në rajon dhe kjo tendencë duhet vlerësuar”, theksuan ekspertët e Bankës së Shqipërisë. Rreziku i kreditit u ul përgjatë periudhës, ndonëse mbeti pranë nivelit të një viti më parë, kreditë me probleme u ulën në 18.3%, mbulimi i kredive me probleme me provigjione dhe kapital u përmirësua, koletarizimi i kredive është i qëndrueshëm, si dhe shpërndarja sipas monedhës, sektorëve dhe bankave është më e mirë”, thanë ekspertët e BSH-së.

Kredia me probleme

Në uljen e kredive me probleme kanë ndikuar proceset e mbledhjes, ristrukturimit dhe largimit të tyre nga bilancet. BSH thekson se zhvillimet janë pozitive dhe inkurajuese, por procesi i uljes së kredive me probleme përmban pasiguri. Bankat munden të ruajnë fokusin në këtë proces. Rreziku i likuiditetit vlerësohet i ulët nga Banka e Shqipërisë. Kjo për shkak të vlerës së ulët të raportit kredi/depozita, vijimi i rritjes së depozitave, prania e lartë e aktiveve likuide dhe rezultatet e ushtrimit të provës së rezistencës. Sipas monedhave, rreziku i likuiditetit në valutë është më i lartë se ai në lekë, ndaj kjo duhet të reflektohet në rritjen e kërkesës minimale për aktive likuide në valutë (de-euroizim). Sektori bankar është i ekspozuar ndjeshëm ndaj rrezikut të tregut, si luhatjet e kursit të këmbimit dhe ndryshimet e normave të interesit.

Portofoli i kredisë

Në strukturën e portofolit të kredisë, pesha e kredisë në lekë ka vijuar rritjen. Në harkun kohor të një viti, teprica e kredisë në monedhën vendase është zgjeruar me 8.2%, ndërsa ajo në valutë është ngushtuar me 1.2%. Kredia e re në lekë, dhënë gjatë periudhës, është rritur me 21 p.p. dhe zë 61% të totalit të kredisë së re të periudhës. Ajo vijon prirjen rritëse të viteve të fundit, duke u zgjeruar me 62% nga e njëjta periudhë e një viti më parë. Kredia e re në valutë, dhënë gjatë periudhës, është ulur me 31% ndaj së njëjtës periudhë të një viti më parë. Në mbështetje të kreditimit në monedhën vendase, sektori bankar ka ulur normën e interesit të kredisë së re në lekë me 1.8 p.p. në nivelin 5.5%. Norma e interesit të kredisë së re në euro shënon 4.6%, në rënie më të ngadaltë me 0.73 p.p. gjatë gjashtëmujorit të fundit të vitit të shkuar.

 


Shfaq Komentet (0)

Shkruaj nje koment

Your email address will not be published. Required fields are marked *

* *

This site uses Akismet to reduce spam. Learn how your comment data is processed.