Gjatë një aktiviteti për projekt-ligjin mbi pronësinë intelektuale në të cilat ishin të pranishme ministret Mirela Kumbaro, Milva Ekonomi dhe Milena Harito, kompozitori i njohur shqiptar Aleksandër Lalo ka qenë disi i ashpër gjatë fjalimit të tij. Ai pasi e ka përfunduar është larguar pa pritur përgjigje nga ministret, e sidomos nga ministrja e Kulturës, Kumbaro.
“Kjo na intereson, nuk na interesojnë imazhe. Ne flasim në të shkuarën, krahasimet i bëjmë gjithmonë, fusim dhe pak politikë brenda. Nuk na duhet e shkuara se çfarë është bërë, na duhet se çfarë bëhet sot. Kaq ishte fjalimi i im, se do të shkoj të bëj drekën”, – u shpreh Lalo, duke u larguar nga podiumi.
Në çastin kur po i drejtohej derës, Kumbaro, i ka thënë Lalos të priste përgjigjen. Mirëpo, ai nuk ka ndaluar dhe i është kthyer ministres: “Nuk e dua, jepua këtyre, unë nuk fola për vete”,- tha kompozitori Lalo, duke u larguar më pas nga konferenca. “OraNews”