Ka komentuar situatën e mbrëmshme kryetari historik shqiptar i Kuvendit të Maqedonisë, Talat Xhaferi, i zgjedhur dje në një seancë të jashtëzakonshme.
Ajo që ka ndodhur mbrëmë në Maqedoni do të ketë pasojat e veta, ka thënë ai.
“Situatë e vështirë. Veprimet e mbrëmshme do të kenë pasojat e veta”, ka thënë Xhaferi për zeri.info.
Megjithatë ai ka shtuar se tani pritet që gjithçka të shkojë në vendin e vet, ndërkohë që ka konfirmuar se deputetët shqiptarë janë mirë.
“Ne u evakuuam menjëherë dhe nuk ishim më në rrezik. Sidoqoftë, tani besoj që gjithçka do të shkojë në vendin e vet”, ka shtuar Xhaferi.
Ndërkohë dje me t’u zgjedhur kryetar i Kuvendit, Xhaferi ka premtuar se si kryetar i zgjedhur edhe pse në këto rrethana, në asnjë mënyrë nuk do lejojë uzurpim të institucioneve.
