Darina TANUSHI
Kryesia e LSI-së nisi mbrëmë diskutimin për mbylljen e listës së kandidatëve për deputetë në 12 qarqet e vendit, për ta dorëzuar atë brenda ditës së sotme në Komisionin Qendror të Zgjedhjeve. Menjëherë pas zgjedhjes nga Parlamenti si President i Republikës, kreu i LSI-së, Ilir Meta ka nxituar në selinë e partisë për të mbyllur edhe listën e deputetëve. Para fillimit të mbledhjes së kryesisë, ai është takuar me dy bashkëpunëtorët e tij, Luan Ramën e Petrit Vasilin. Ashtu siç e deklaroi edhe vetë kreu i LSI-së, tashmë atë do ta zëvendësojë në këtë pozicion Petrit Vasili, i cili ishte më i votuari nga Komiteti Drejtues. Vasili do të jetë kryetar i LSI-së për të çuar deri në fund mandatin që Meta e mori pak muaj më parë. Ndërkohë, burime nga mbledhja e kryesisë, e cila do të përfundojë sot listën me të gjithë emrat e kandidatëve të saj për deputetë, rreth 90% e deputetëve aktualë të LSI-së janë rikonfirmuar për të qenë sërish pjesë e listave dhe për të garuar në zgjedhjet e 18 qershorit. Do të jetë vetë Meta, që do ta udhëheqë LSI-në deri në zgjedhje, pasi mandatin e ri si president, ai do ta marrë më 24 korrik dhe ligji nuk e ndalon deri në këtë datë. Në Tiranë listën do ta kryesojë Klajda Gjosha e pas saj do të jetë Luan Rama. Në listën e Tiranës mësohet se është futur edhe ish-ministri i Drejtësisë, Ylli Manjani, një nga zërat më kritikë të LSI-së për qeverinë. Kandidati i parë i PS-së, në Tiranë mësohet të jetë ish-ministri Saimir Tahiri. Në Elbasan listën e kryeson vetë Monika Kryemadhi, e cila e konfirmoi këtë edhe pas daljes nga seanca zgjedhore për presidentin. Po në Elbasan, i dyti në listë do të jetë edhe ish-ministri Edmond Haxhinasto. Ndërkohë që PS tashmë e ka të konfirmuar që të parin e listës në këtë qark do të ketë Taulant Ballën dhe të dytën ministren Mimi Kodheli. Në Durrës do të jetë ministri Lefter Koka. Ministri i Bujqësisë, Edmond Panariti do të jetë kandidat në Korçë e pas tij, nënkryetarja e bashkisë, Brunilda Paskali. PS në Korçë e kryeson listën me Niko Peleshin. PS nga ana e saj në Shkodër ka vendosur të parin në listë Ditmir Bushatin. LSI i ka besuar Agron Çelës si i pari i listës dhe të dytit Dritan Yllit. Ndërkohë që në Lezhë, do të jetë Viktor Tusha e Gjovalin Kadeli. Në Dibër mësohet se do të jetë sërish deputeti Përparim Spahiu i pari i listës, ndërsa në Vlorë kryetari i komitetit drejtues të LSI-së, Shezai Rrokaj së bashku me ministrin e Transporteve, Sokol Dervishaj. Në Vorë PS ka vetë Edi Ramën e Damian Gjiknurin, ndërkohë vetë Petrit Vasili duket se ka vendosur të shkojë në Fier. Ndërsa në Gjirokastër në këto zgjedhje do të jetë sërish Vangjel Tavo i pari në listë, ndërsa PS ia ka besuar ish-ministrit Bledi Çuçi. Ndërkaq, PS ka vendosur që të përfundojë sot listën me emrat për deputetë në një mbledhje kryesie pasdite vonë.