Familja Mema është prej atyre që përbëjnë edhe historinë e Tiranës. Jo vetëm në sport, por edhe në të gjitha sferat e kryeqytetit. Një prej plejadës së futbollistëve dhe trajnerëve që kanë bërë historinë e lavdishme të Tiranës është edhe Sulejman Mema.
I kontaktuar nga “Panorama Sport” për të dhënë ndjesinë dhe opinionin e tij për këtë moment historik të Tiranës, ai është fjalëpakë dhe kërkon ndjesë që nuk mund të flasë shumë.
I pyetur nëse e kishte menduar ndonjëherë që Tirana të luante në Kategorinë e Parë, ai e ka përshkruar me një fjalë: “Asnjëherë!”. Domethënëse për vetë historinë e kësaj skuadre dhe këtij klubi me shumë lavdi.
Sa i përket ndjesisë që ka përjetuar në momentin e përfundimit të finales së mbijetesës, Mema sërish nuk ka folur shumë, por në bisedën telefonike, edhe vetë frymëmarrja e tij e ka shfaqur tensionin tek ishtekniku i kryeqytetasve, që aktualisht është pjesë e akademisë së klubit.
“U ndjeva keq!”, kjo ka qenë përgjigjja e marrë nga njëri prej legjendave të klubit bardheblu, të cilit duket se kjo situatë i ka “marrë edhe fjalët”, e thënë në gjuhën popullore.