“Të la partia jashtë listës së deputetëve”, ja si u përgjigjet komentuesve tropojania e PD-së

Mimoza Hajdarmataj është një tjetër emër që mbeti jashtë listës së kandidatëve për deputetë të PD-së, por kjo nuk e pengon politikanen që të vazhdojë mbështetjen e saj për opozitën. Në një postim në rrjetin social “Facebook”, ajo ka publikuar një imazh nga një miting i PD-së, ku shihet qartë slogani i kësaj partie ‘Ekonomi e fortë, e nesërme e sigurt’. Komentuesit duke pritur që ajo do të shfaqte pakënaqësi për mos rikandidimin si “deputete” e kanë “ngacmuar”, duke ia rikujtuar atë.  Ndërkohë që shumë të tjerë kanë ndjerë keqardhje për mospërfshirjen e saj në listat e kandidatëve.

Ja si i thotë njëri prej tyre deputetes, Hajdarmataj: “Po ti moj Moza a dole deputet se te çadra ishe prezent gjithë kohën. Ti je demokrate e flakët”. Dhe Mimoza Hajdarmataj i ka kthyer një përgjigje modeste komentuesit, ku duket qartë se jo vetëm që nuk i ka mbetur hatri, përkundrazi do të vijojë mbështetjen për Partinë Demokratike. Ajo e quan pozicionin e deputetes, “karrige”, ndërsa demokrat shpirt dhe ideal.

“Deputet do të thotë ‘karrige’ miku im, ndërsa demokrat do të thotë shpirt dhe ideal. Na duhet të jemi shumë e shumë demokrat që të arrijmë të nxjerrim edhe shumë deputet. Kështu forca jone politike PD kthehet në pushtet si shprese për të gjithë ne”.