Ish-kreu i LSI-së dhe presidenti i zgjedhur Ilir Meta tha në studion e emisionit “Të paekspozuarit” se ka një diferencë mes Edi Ramës dhe Lulzim Bashës. I pyetur nga gazetarët në studio, Meta tha se me Partinë Socialiste mund të ketë një koalicion qeverisës pas 25 qershorit, por pa Ramën kryeministër.
“LSI do të dalë forcë e parë dhe nuk bëhet fjala për të qenë forcë plotësuese. Rama na e ka lehtësuar këtë punën e ditës së hënë, duke e përjashtuar koalicionin me LSI, ne nuk e përjashtojmë bashkëpunimin me PS, por pa Edi Ramën”, – tha Meta.
Ndërsa në krahun tjetër Meta i dha Bashës edhe 72 orë kohë të kthehet te idetë e çadrës në mënyrë që mes PD dhe LSI të ketë një mundësi bashkëpunimi.
“Për Bashën kam këtë mesazh. Tradhtinë e duan të gjithë, por tradhtarin nuk e do asnjë. Duhet t’ia afrohet më shumë kauzës së protestës për zgjedhje të lira, për luftën ndaj krimit, për përpjekjet kundër oligarkisë. Nuk ka shans dyshja Rama-Basha të marrë 71 mandate. Kas shumë demokratë e socialistë të zhgënjyer. Plus që kanë edhe shumë parti të tjera që padyshim do të marrin mandate; i ftoj të gjithë ata qytetarë që janë të lodhur nga politika, që të zgjedhin alternativën e duhur. Ata që nuk duan të votojnë LSI-në, të shkojnë për një alternativë tjetër demokratike”, – tha Meta.
Duke iu referuar marrëveshjes Rama-Basha, Meta thotë se të dy kanë vendosur të eliminojnë zgjedhjet.
“Rama kërkon të eliminojë zgjedhjet e lira. Pasi mori kreun e opozitës në errësirë bëri marrëveshje si të pushtojë televizionet, si të frikësojë qytetarët shqiptarë që të mos votojnë asnjë parti tjetër. Ngriti një task forcë që vepron në errësirë”, – tha ai.
Presidenti i zgjedhur Ilir Meta bëri edhe një deklaratë të fortë, kur tha se qëllimi i Rilindjes është zhbërja e Partisë Socialiste.
“PS është viktima e parë e Rilindjes dhe mavisë. Ka shpallur zhbërjen e PS. Çfarë thotë ky, që PS s’ka as histori, as flamur, se ky thotë në 27 vjet s’është bërë asgjë”,– shtoi ai
Sheiku Like Floriri, Kryehajduti me çizme e me bllok i Shqipërisë.