Kryeministri Edi Rama përsëriti për të disatën herë publikisht se nuk do të ketë koalicion PS-LSI pas zgjedhjeve të 25 Qershorit. Deklarata e përsëritur edhe njëherë sot nga Edi Rama, tregon se kreu i PS ia ka mbyllur derën partisë së Ilir Metës për koalicion. Por ndryshe nga herët e tjera, Rama shkoi përtej kësaj, kur u pyet për një koalicion të mundshëm me Lulzim Bashën.
“Çdo skenar për mua është i hapur në varësi të vendimmarrjes së popullit” u shpreh kryeministri kur u pyet për mundësinë e një koalicioni PS-PD pas zgjedhjeve.
Ish kreu i LSI dhe presidenti i ardhshëm, Ilir Meta gjithashtu ka mohuar mundësinë e një koalicioni me Partinë Socialiste pas zgjedhjeve të 25 Qershorit. Por pas marrëveshjes Rama-Basha, LSI është mes dy zjarresh, pasi sulmohet njësoj si nga Partia Socialiste, ashtu edhe nga Partia Demokratike.
Në këtë fushatë, LSI pretendon të dalë forcë e pare dhe Petrit Vasili është kandidati i saj për kryeministër.
