Nga Blendi FEVZIU
Ka ende shumë për t’u numëruar, por tendenca e këtyre zgjedhjeve duket tashmë qartë. PS me gjasë do të qeverisë e vetme, duke pasur në autobusin e saj elektoral votat e thuaj gjysmës së shqiptarëve.
LSI jo vetëm ka konfirmuar votat e marra në një koalicion në 2013-ën, por besohet se i ka rritur ato, duke qenë në disa qarqe të vendit forcë e dytë politike.
PD ka pasur një humbje shumë më të thellë se sa ajo e 2013-ës, që mendohej më e thella e historisë politike të saj.
Do ketë kohë për analiza dhe për të gjetur gabimet, por deri tani shikimi i shifrave tregon vetëm një gjë, elektorati i djathtë ka bojkotuar në mënyrë masive ofertën e partisë kryesore të tij. Përse e them këtë?
Dje në Shqipëri kanë votuar thuajse 300 mijë vetë më pak se sa në vitin 2013. Në këtë rënie të votuesve, befas, sipas projeksionit, PS mund të jetë rritur me afro 100–130 mijë vota. Pra, ka marrë në total thuajse 100 mijë vota më shumë se sa arriti të merrte në 2013-ën. Ajo pritet të shtojë diku tek 6–8 deputetë. Pra, shtimi nuk është nga ulja e numrit të votuesve, por nga rritja e tyre.
LSI po ashtu i ka shtuar votat. Ajo pritet jo vetëm të konfirmojë 15 mandatet e 2013-ës, që i mori në koalicion me PS, por mund të shkojë deri në 20 mandate. Pra në këtë rast, e majta ka arritur të nxjerrë më shumë votues se në 2013-ën, ose të marrë disa votues që në 2013-ën kanë votuar Berishën.
Katastrofa ka ndodhur djathtas dhe arsyet se përse janë shumë. PD, jo vetëm që nuk ka konfirmuar mandatet e 2013-ës, që mendohej se ishin të ulët pas 8 vjet qeverisjeje, por ka marrë shumë më pak vota se në 2013-ën dhe akoma më pak se në 2015-ën. Besohet se 300 mijë votat e munguara kanë qenë kryesisht të PD. Kanë qenë demokratët që nuk janë paraqitur në apel. Arsyet më mirë se kushdo i di vetë lidershipi i PD, por ajo që është e qartë është se nuk ka qenë një mosdalje apo neglizhencë ndaj zgjedhjeve, por një bojkot, një protestë e heshtur dhe spontane. Pak rëndësi kanë gabimet në fushatë. Ata që votojnë PD kanë votuar kundër një qëndrimi politik dhe unë dyshoj se kjo braktisje ka qenë një protestë ndaj qëndrimit flirtues me PS në fushatë. Po ashtu ka luajtur rol lista dhe spastrimi nga disa emra të njohur. Për fatin e saj të keq, PD do ketë në parlament një grup diletant, me mungesa të ndjeshme dhe të paaftë për të marrë mbi vete peshën që i takon opozitës.
Së fundmi, kjo që ndodhi në këto zgjedhje po stabilizon një trend të frikshëm të çmontimit të partisë më të madhe të djathtë në vend. Në 2009-ën, PD kishte 70 mandate bashkë me aleatët e saj; PS 66 dhe LSI 4. 8 vjet më pas, PS po shkon në 74 dhe LSI në 20. Të dyja janë rritur, madje akoma më shumë se sa në 2013-ën, ndërsa PD thuajse është përgjysmuar. Një humbje më dramatike vështirë se mund ta parashikonte kushdo…
