68-vjetori i themelimit të Republikës Popullore të Kinës si dhe promovimi i botimit në shqip të librit të Presidentit Xi Jinping, “Qeverisja e Kinës” është kremtuar të premten në Muzeun Historik Kombëtar në Tiranë. Në takimin e mbajtur morën pjesë Presidenti i Republikës Ilir Meta, zv.kryeministrja Senida Mesi, ministrja Mirela Kumbaro, kreu i kuvendit Gramoz Ruçi, deputetë e ambasadorë.
Me tinguj këngësh shqiptare të interpretuara në gjuhën kineze, ambasada kineze promovoi librin e presidentit kinez i cilësuar si një nga reformatorët më të mëdhenj dhe njeriu që qëndron pas mrekullisë kineze. Në faqet e këtij libri prezantohet edhe teza kryesore e qeverisjes së tij, parimi i të shërbyerit të popullit në radhë të parë. Libri është i ndare në 18 kapituj ku përfshihen 79 fjalime, biseda, intervista, udhëzime dhe korrespondenca. Botimi konturon filozofinë e qeverisë së bazuar në reforma, zhvillim ekonomik të qëndrueshëm, çështjet e brendshme dhe të jashtme . “Jam e bindur që botimi i librit të presidentit kinez do të thellojë njohjen e popullit shqiptar për Kinën dhe të nxisi ndjeshmërinë popullore në kuadër të iniciativës “Një brez, Një rrugë” si dhe bashkëpunimin kino-shqiptar” tha ambasadororja kineze Jiang Yu. Në ceremoni merrte pjesë edhe Zhang Fuhaoi, Presidenti i grupit Ndërkombëtar të botuesve të Kinës i cili e konsideroi botimin në shqip si një ngjarje e madhe edhe në raportet historike mes dy vendeve. “Qeverisja e Kinës” që në shekullin e 21-të revokon brezin ekonomik të “Rrugës së Mëndafshit” së para dymijë vjetëve, e që lidh Kinën e sotme dhe rajonin e Azisë Lindore me Evropën. “Botimi në shqip i librit të Presidentit Xi Jinping është një mundësi për të njohur dhe kuptuar më mirë Kinën e sotme, filozofinë dhe vizionin e lidershipit të saj, reformat e ndërmarra dhe ndryshimet e thella, ambicjet e saj ekonomike dhe hapjen ndaj investimeve të huaja, rolin e saj të rëndësishëm në arenën ndërkombëtare, jo vetëm për studiuesit, diplomatët, por edhe për lexuesit e thjeshtë” tha presidenti Ilir Meta. “Republika Popullore e Kinës përfaqëson jo vetëm një vend mik, por mbi të gjitha një partner domethënës tregtar dhe ekonomik për Shqipërinë. Shqipëria i kushton një rëndësi shumë të madhe e të veçantë, forcimit të bashkëpunimit me Republikën Popullore të Kinës” shtoi zoti Meta. Më herët, Muzeu Historik Kombëtar priti në ambientet e tij një delegacion nga Republika Popullore e Kinës, kryesuar nga Zhang Fuhai, president i Grupit Ndërkombëtar të Botuesve të Kinës, e cila është shtëpia botuese e librit të Presidentit të Republikës Popullore të Kinës Xi Jinping “Qeverisja e Kinës”. Delegacioni falenderoi drejtorin e Muzeut Historik Kombëtar Dorian Koçi dhe stafit të muzeut për përkushtimin që treguan në organizimin e promovimit të librit “Qeverisja e Kinës” në gjuhën shqipe dhe për organizimin e 68 vjetorit të Ditës Kombëtare të Kinës. Drejtori Koçi u shpreh se: “Ambasada Kineze është një nga partnerët tanë më të mirë në fushën e bashkëpunimeve kulturore dhe është për t’u admiruar mënyra e zhvillimit ekonomik të Kinës dhe suporti që ajo tregon për vende të tjera. Botimi i këtij libri në gjuhën shqipe është një mjet shumë i mirë për të njohur shqiptarët më afër më politikën dhe kulturën kineze.” Në fjalën e tij Fuhai u shpreh se “Ne jemi njohur me historinë shqiptare dhe jemi të befasuar nga ajo. Me këtë libër të presidentit Xi Jinping është mënyra më ë mirë për të njohur ndryshimet që ka kaluar Kina dhe është çelës i mirë për të ditur arsyet pse ky libër ka marrë vëmendje kaq të madhe në botë.”
Libri “Qeverisja e Kinës” është botuar në 23 gjuhë të botës, ndërsa janë shitur 6.45 milion kopje të tij në gjithë botën. Ai përfshin 79 fjalime, biseda, intervista, udhëzime dhe korrespondenca nga muaji nëntor 2012 deri në muajin korrik 2014.