Në Studion e Hapur me Eni Vasilin, gazetarët i kujtuan kreut të Partisë Demokratike, Lulzim Bashës “ngrirjen” që Berisha i bëri Spartak Ngjelës kur ai e përgjoi në mbledhjen e grupit. Por Basha tha se refuzon të bëjë hetime dhe dënime për përgjimin e mbledhjes së kryesisë.
“Eshtë një akt i padenjë, akte të tilla janë të dënueshme. Nuk po hetojmë dhe as kemi ndërmend të hetojmë. Në kuptimin etik, marrim nga ky incident mesazhin e duhur që kjo është diçka e dënueshme. Autori ishte fare i qartë, unë nuk do bëj gjueti shtrigash. Kemi një qëndrim unanim që e dënon këtë” u shpreh Basha që nuk dha emra për personin e dyshuar për përgjimin.
Në mbledhjen e kryesisë së PD-së pati një përplasje të fortë mes të pakënaqurve me listat, fushatën dhe rrjedhjen e votave në votimin e Gramoz Ruçit në parlament. Konflikti arriti kulmin kur Jemin Gjana tentoi të godasë fizikisht Valbona Mezinin, Sekretare për Organizatat Partnere.
