Kryetari i PD-së, Lulzim Basha, nga foltorja e Kuvendit ka zbuluar sot se Policia e Shtetit nuk arriti të arrestonte personat që e goditën atë në Elbasan, ishte sepse ajo magazinë ishte “kështjella e Edi Ramës, e krimit, e bandës, që ka imunitet.
Basha i kërkoi Kryeministrit Edi Rama të shkëpusë lidhjet me krimin duke shkarkuar Gramoz Ruçin, Fatmir Xhafajn, Qazim Sejdinin dhe krerë të Policisë, “të dilte nga magazina e krimit”, siç e cilësoi ai.
“Sot nga kjo sallë, të kërkoj ty, Edi Rama, largo Gramoz Ruçin dhe Fatmir Xhafajn nga drejtimi! Shkarko menjëherë Qazim Sejdinin!
Spastro radhët e Policisë nga bashkëpunëtorët e trafikut të drogës.
Por ti këto nuk ke për t’i bërë dhe as ke ndërmend t’i bësh!
Le t’i kthehemi dhe njëhërë situatës së Elbasanit, ku Policia u shpartallua në mes të qytetit nga një bandë. Policia nuk e kaloi portën, rrethimin, jo se nuk ka oficerë të përgatitur dhe kurajozë, por se ajo kështjellë është e Edi Ramës, e krimit, e bandës, ka imunitet. Nuk e çan dot atë. Ndaj të mos ia kërkojë këtë oficerëve, por t’ia kërkojë Edi Ramës që të dalë nga magazina e krimit.”