Floreta GJOKA
Unë jam Floreta Gjoka, një nga vajzat e regjisorit dhe aktorit Viktor Gjoka, historia personale e të cilit përveç se na vrau para 50 vitesh, po na rivret sërish sa herë që në gazeta botohen artikuj mbi jetën e tij private. Unë kam qenë vajzë e rritur kur babai im vendosi të linte nënën dhe katër fëmijë që ishim ne, për të nisur një histori të re. Se si nisi, ne as nuk kemi dashur të futemi në të thella e të merremi me të, pasi unë kisha një nënë fisnike që na brumosi dhe ne fëmijëve të tillë e plot dinjitet. Nëna ime, veç bukurisë e mirësisë, kujdesej për tim atë duke qenë asistentja e tij personale, duke pasur merita të veçanta në karrierën e babait tim. Ato e donin dhe e respektonin njëri-tjetrin aq kohë sa ishin bashkë me çdo kënaqësi e problem si gjithë familjet që jetuan në ato kohëra. Në çdo shkrim të deritanishëm pasi lartësohet figura e babait tim, tregohet dhe historia e tij me gruan e dytë Helenën, që ishte më e re në moshë se ai e që sipas thashethemeve unë e kam pasur shoqe. Ky fakt krejtësisht i rremë, i pavërtetë ka tronditur mua dhe familjen time për vite me radhë dhe na ka dëmtuar psikologjikisht shumë, sidomos mua e time më, e cila padyshim që nuk besonte në andralla të tilla. Sot, unë Floreta Gjoka pensioniste rrëfej siç kam treguar gjithmonë se unë s’kam pasur asnjë lidhje me Helenën. Ajo s’ka qenë kurrë pjesë e jetës sime. Unë kam norma të larta morale. Ndaj, ju lutem, ju shkronjësve të artikujve mbi babain tim, më lini rehat, boll kemi vuajtur dramën e ndarjes së babait nga familja jonë. Nuk paragjykoj askënd që mund ta bëjë veprimin e mësipërm, pra të ketë shoqëri me gruan apo burrin e prindit respektiv, por unë nuk e kam bërë, thjesht sepse kjo jam unë, e ky është morali im. Mesa kuptoj nga gjithë kjo gënjeshtër mbi mua, duket se njerëz të caktuar duan të përligjin veprimet e tyre duke më përfshirë mua në histori si gjoja mikesha, por kjo është një maskaradë, fyerje për mua e familjen time. Tani që jam në këtë moshë kuptoj se indirekt këta persona na e kanë nxirë jetën duke ushtruar presion psikologjik prapa shpine deri në persekutim. Si të rinj e të pafajshëm që ishim, atë here nuk e dinim shkakun pse krijoheshin shqetësime nga më të ndryshmet. Jeta jonë private ishte e pavarur nga ky problem a histori e ndodhur më parë. Problemi ynë ishte se na mungonte një prind. Të gjithë këtë barrë, të fjalëve, thashethemeve, e kam mbajtur unë padrejtësisht dhe sot që kanë kaluar 50 vjet, kjo histori rikthehet sërish e pandryshuar, pa etikën që dikush lëndohet. Mjaft më! Unë s’kam qenë kurrë shoqja e gruas së dytë të babait tim.
Budallaqe komunizmi