Skënderbeu do të jetë në pjesën më të madhe ai ekip që luajti në ndeshjen kundër Jang Bojsit, por me një dilemë të vetme për sa i përket mbrojtjes. Gjithçka do të nisë me kapitenin Shehi në portë, për të vazhduar më pas me Vangjelin në krahun e djathtë dhe me dyshen Radas e Jashanica në qendër të mbrojtjes.
Në krahun e majtë është balotazhi i hapur mes Micit dhe Alitit. Ky i fundit duket më i avantazhuar për të luajtur sot nga minuta e parë, nisur edhe nga ngarkesa e madhe që Mici ka marrë këtë periudhë. Gjithsesi, kjo dilemë do të zgjidhet deri në momentet e fundit para ndeshjes.
Ndërsa në mesin e fushës, Osmani është rikuperuar nga dëmtimi, por do ta nisë nga stoli dhe Daja do t’i besojë në rolin e shkatërruesit Ditës. Në qendër të mesfushës do të aktivizohen Lilaj dhe Muzaka. Ndërsa sulmi pritet të mbetet i pandryshuar, me Takun dhe Xhejms që do të luajnë nga krahët në mbështetje të Ali Soue, shkruan PanoramaSport.
Ky i fundit, që kur është bërë pjesë e Skënderbeut, ka luajtur rregullisht si titullar dhe pak herë është zëvendësuar. Por, forma që po kalon është një garanci më vete për Dajën, i cili nuk ka të gatshëm as sulmuesin tjetër, Martin Nespor, por gjithashtu për shkak dëmtimi edhe mesfushorin Bakari Nimaga.