Në përfundim të “Tetorit Rozë”, muajit të ndërgjegjësimit në luftën kundër kancerit të gjirit, Instituti i Shëndetit Publik ka publikuar listën e ekzaminimeve të kryera nga mamografët në të gjithë vendin. Në total, mjekët kanë kryer rreth 3 mijë ekzaminime brenda 2017-ës, ku numri më i lartë i tyre paraqitet në Lezhë, me plot 547 kontrolle për kancerin e gjirit. Më tej, një shkallë të lartë interesimi ka pasur edhe në qytetin e Hasit, në të cilin 266 gra kanë bërë ekzaminimin e gjirit, për të vijuar me Pogradecin, me 254 ekzaminime. Ndërsa, numri më i ulët i ekzaminimeve ka rezultuar në zonën e Alliasit në Tiranë, me vetëm 11 të tilla. Në kuadër të muajit të ndër-gjegjësimit kundër kancerit të gjirit, edhe ministrja e Shëndetësisë dhe Mbrojtjes Sociale, Ogerta Manastirliu ka organizuar një sërë aktivitetesh sensibilizuese. Ajo gjithashtu ka ndërmarrë masa për luftën ndaj kësaj sëmundjeje.
Mamografia
Mamografia kap kancerin e gjirit në faza shumë të hershme e rezultati i saj zakonisht merret mbas disa javësh. Për gratë që kanë kryer mamografi më parë, këshillohet të kenë filmat e tyre me vete për t’i lejuar mjekut të bëjë krahasimin. Nëse mamografia është normale, duhet vazhduar bërja e saj sipas intervaleve kohore të rekomanduara. Kanceri i gjirit mund të shfaqet në çdo kohë, madje edhe nga një mamografi tek tjetra, prandaj mamografia duhet bërë në mënyrë të vazhdueshme dhe jo vetëm një herë. Nëse mamografia është e parregullt, nuk do të thotë gjithmonë se ka kancer. Për këtë duhet të bëhen teste shtesë dhe kontrolli nga një specialist i gjirit apo një kirurg.
Sensibilizimi
Në kuadër të ndërgjegjësimit në luftën kundër kancerit të gjirit, në Spitalin Onkologjik në Qendrën Spitalore Universitare “Nënë Tereza” u dhuruan paruke për pacientet, të cilat janë duke luftuar kundër kësaj sëmundjeje. Dhurimi u bë nga organizata jofitimprurëse “Europa Donna Albania”, e cila ka për qëllim të ndihmojë gratë e prekura nga kanceri i gjirit. Paruket ishin të krijuara me flokë natyralë të vajzave dhe grave, të cilat kanë qenë pjesë e fushatës të nisur tashmë prej një viti “Dhuro flokë, fal shpresë” dhe që ka si qëllim dhurimin e flokëve për të krijuar paruke për gratë që janë duke u përballur me luftën e ashpër ndaj kancerin e gjirit.
Ekzaminimet e mamografisë të kryera në 2017 sipas rretheve
Vlorë 79
Patos 217
Fier 66
Libofshë-Fier 199
Frakull-Fier 61
Lushnjë 231
Bërzhitë, Tiranë 15
Poliklinika 3, Tiranë 23
“Don Bosko”, Tiranë 13
Allias, Tiranë 11
Kukës 192
Qendra Shëndetësore Farke 22
Has 266
Lezhë 547
Tropojë 132
Pogradec 254
Kuçovë 56
Bilisht 173
Fier-Frakull 104
Librazhd 130
Fier 107
Durrës- Kënetë 75
Tirane ISHP 11
Vlorë 36
Total 2987