Paraditen e së dielës në ambientet e stadiumit “Elbasan Arena” u mbajt një takim përkujtimor në 10 vjetorin e vdekjes së ish-futbollistit dhe trajnerit legjendar të Elbasanit, Frederik Jorgaqi (Lashi). Legjenda e futbollit dhe trajningut elbasanas mbahet mend edhe për titullin e parë kampion të skuadrës së Elbasanit në vitin 1984, me trajner pikërisht Jorgaqin dhe ndihmësin e tij Dashamir Stringa. Në atë kohë ekipi i Labinotit sot F.K.Elbasani mbahet mend jo vetëm për shpalljen kampion kombëtar, por edhe për rekordin e mbajtjes së paprekur të rrjetës për 1037 minuta, ndërsa porta mbrohej nga Bujar Gogunja. Gjatë asaj periudhe punën e Frederik Jorgaqit te palodhur, dolën breza të tërë futbollistësh dhe trajnerësh në qytetin e Elbasanit, të cilët sot vazhdojnë me përkushtim metodat e tij të punës dhe pasionin që e karakterizonte. Vepra dhe puna e tij përkujtohen gjithnjë nga brezat e rinj, të cilët duan të ecin në rrugën e tij si futbollist, por edhe si trajner.
Të pranishëm në këtë takim përkujtimor ishin familjarët, miq të legjendës elbasanase, bashkëkohës të tij, ish-futbollistë dhe trajnerë të mirënjohur të futbollit shqiptar. Aktiviteti i mirëorganizuar nga shefi i F.K.Elbasani Florenc Kushi ishte një homazh në nderim të kontributit të jashtëzakonshëm të dhënë nga Frederik Jorgaqi si futbollist dhe si trajner i Elbasanit. Si u fut në historinë e shkëlqyer të futbollit të këtij qyteti , ekipin e të cilit e shpalli kampion për herë të parë dhe futi në listën e rekordmenëve botërorë portierin e këtij ekipi Bujar Gogunja që nën drejtimin e ekipit nga ky trajner vendosi rekordin historik të mbajtjes së paprekur të portës për 1037 minuta gjatë 12 ndeshjeve . Fatmir POPJA
