“Një vrasës shqiptar në Britani të Madhe nuk është dëbuar ende, edhe pse ka kaluar pothuajse një vit qe kur çështja e tij doli në dritë”. Kështu ka shkruar sot “The Sun” për shqiptarin Selami Çokaj, nga Shoshani i Tropojës.
Media britanike ka bërë të ditur se 43-vjeçari po punon ende në të njëjtin lavazh që zotëron edhe pasi u depertua në Shqiperi dhe u kthye serish.
“43-vjeçari po fiton më shumë se 40,000 funte në vit nga biznesi i tij në Oadby, Leicester”, shkruan “The Sun”.
Çokaj, dikur në listën e më të kërkuarve të Interpolit, u dëbua nga Britania e Madhe dhe u kthye sërish duke hapur një biznes fitimprurës në pronësi të tij.
43-vjeçari u dënua me 15 vite burg në vitin 1994 në Shqipëri pasi vrau një person me thikë dhe më pas dënimi u rrit në 20 vite për grabitje me armë. Pas 3 vitesh burg, Çokaj u arratis nga burgu i Shën Kollit në Lezhë dhe emigroi për në Britani duke përdorur emrin e rremë Valton Gashi.
Ai u vendos në Mansfield, Notts, Nottinghamshire, ku hapi një lavazh makinash dhe takoi gruan e tij të ardhshme.
E kaluara e tij u zbardh në vitin 2006 dhe pas një procesi 3-vjeçar ekstradimi ai u dëbua nga Britania e Madhe.
Zyrtarët e dëbuan Çokajn në vitin 2009, pasi zbuluan se ishte arratisur nga burgu për mosshlyerjen e dënimit prej 20 vitesh në Shqipëri.