Në lajmet tona të “show-bizz”-it, në rubrikën “nostalgji” mund të gjeni fotografi, lajme apo intervista të veçanta, të publikuara gjatë viteve në suplementin “Bluetooth” të “Gazetës Shqiptare”. Në GSH.al, sot po ju sjellim: Dinamo-Partizani, politikanë dhe tifozë kundërshtarë
Topi-Harasani, “Fair Play” në tribunën VIP
Në politikë kanë qenë gjithnjë kundërshtarë për shkak të pozicionimit njëri te PD e tjetri te PS, por Presidenti Topi dhe deputeti Andis Harasani janë kundërshtarë edhe në futboll. Kreu i shtetit njihet si një tifoz i madh i Tiranës, ndërsa ish-drejtori i KESH është i njohur si fans i Partizanit. Megjithatë, ashtu si lojtarët në fushë, Topi e Harasani e kanë nisur “ndeshjen” me një “Fair Play” mes tyre. Një shtrëngim duarsh që i ka dhënë startin ndeshjes më të rëndësishme të sezonit.
Për Malajn, Dinamo ka më shumë shanse…
Ish-ministri i financave Arben Malaj është i fiksuar pas llogaritjeve dhe shkresurinave. Si një person i tillë, ndeshja për Malajn nis nga formacioni. Madje, pasi i ka parë mirë 22 njerëzit që do të zbrisnin në fushën e lojës, Malaj ka bindur edhe presidentin e Dinamos Besnik Sulaj se në fund trofeu ishte i tyre. Ndonëse, për një moment parashikimet duhet t’i jenë lëkundur, pasi Dinamo mbeti me 9 vetë.
Xhani i ankohet Paturrit për arbitrin italian
Në fillim të ndeshjes, arbitri italian Paolo Taljavento nuk ia ka mbushur aspak mendjen presidentit Xhani. Sidomos pasi gjyqtari dha një penallti pas vetëm 4 minutash lojë. Gjërat janë dukur serioze, pasi në krah të presidentit të Partizanit qëndronte një person shumë i “dashur” me arbitrat, si deputeti Hajrulla Paturri. Gjithsesi, për të qetësuar Xhanin më shumë ka menduar ish-presidenti i Tiranës Lutfi Nuri, për të cilin penalltia ishte e padiskutueshme.
Kristaq Mile, po ky për kë vuan në këtë ndeshje?
Ishte normale që tifozët e Dinamos dhe Partizanit të vuanin deri në minutat e fundit në një ndeshje të tillë, ku vendosej titulli kampion. Por gjëja më e habitshme ishte “vuajtja” e trajnerit të Teutës Kristaq Mile, i cili në ato momente duhet të ishte në stadium për ndeshjen me Besën e Kavajës. Mile më shumë duket i interesuar për takimin që do të vendosë titullin, atë mes Dinamos dhe Partizanit, duke “braktisur” skuadrën e tij. Gjithsesi ai e kishte arritur objektivin për të shkuar në plej-of me skuadrën e tij.
Celibashi i rikthehet skenës së futbollit
Nuk mund të mungonte ish-kreu i Komisionit Qendror të Zgjedhjeve, Ilirjan Celibashi, në një ndeshje të tillë. Vendosej titulli kampion dhe për më tepër, luante skuadra e tij e zemrës, Partizani. Në fund, ashtu si shumë tifozë të tjerë të kuq, Celibashi ka mbetur i zhgënjyer, pasi goli i të riut Ferraj në shtesë ka përmbysur ëndrrat për një titull kampion pas 15 vjetësh për Partizanin. E të mendosh që të kuqtë luajtën për 35 minuta me dy persona më shumë.
Ky shkrim është botuar më 24 maj 2008