Emmanuel Macron kërkon që “Baguette”-a franceze, buka aq shumë e pëlqyer në të gjithë botën, të hyjë në listën e thesareve kulturore të UNESCO-s.
“Baguette-ën tonë e ka zili e gjithë bota”, mësohet të ketë thënë ai, duke mbështetur një nismë të nisur nga Shoqata Kombëtare e Bukëpjekësve.
Furrtarët francezë u frymëzuan nga suksesi i picës napolitane, e cila kaloi një vit më parë në mbrojtjen e organizmit kulturor të OKB-së.
Ata këmbëngulin se nuk bëhet fjalë vetëm për emrin dhe formën e bukës, por për recetën dhe përbërësit të cilët duhet të ruhen.
“Përsosmëria dhe ekspertiza duhet të ruhen, e për këtë arsye, ajo duhet shënuar si pjesë e kësaj trashëgimie”, deklaroi Macron.
Baguette-a tradicionale është tashmë e mbrojtur në Francë nga një ligj i vitit 1993, teksa për të ruajtur kriteret, buka duhet të bëhet me katër elementë: miell gruri, ujë, maja dhe kripë.