Sfidat e gjuhës amtare, takim në kryeministri, priten sugjerime konkrete nga ekspertët
COD organizon një tryezë të rrumbullakët, nesër, nw ditën e gjuhës amtare, me titull “Sfidat e shqipes sot”, në bibliotekën e Kryeministrisë. Në takim marrin pjesë studiues të gjuhës dhe kërkues shkencorë nga të gjitha katedrat e gjuhës së universiteteve shqiptare, në Shqipëri, Kosovë e Maqedoni, përkthyes të mirënjohur dhe institucione përgjegjëse. Tryeza trajton problematika që kanë të bëjnë me shqipen e sotme, sfidat e saj në realitetin globalizues, teknologjik, virtual, në sferën administrative, politike, mediatike, edukative dhe kulturore. Aktiviteti është i hapur për mediat.
Tavolina e rrumbullakët moderohet nga prof. dr. Gjovalin Shkurtaj, gjuhëtar i mirënjohur me kontribute disavjeçare në sociolinguistikë. Veç studiuesve të gjuhës nga Tirana, Shkodra, Durrësi, Elbasani, Korça, Vlora dhe Gjirokastra, Instituti i Gjuhësisë dhe i Letërsisë dhe Shoqata e Gjuhësisë Shqiptare, sjellin përvojën e tyre të drejtpërdrejtë në punën me studentët apo kërkimin shkencor, profesorë të Universiteteve të Prishtinës e Prizrenit, Institutit Albanologjik, dhe Universiteteve të Shkupit e Tetovës.
Krahas studiuesve të gjuhës, brenda e jashtë kufijve, pjesëtarë të tryezës me sugjerimet dhe vërejtjet e tyre janë përkthyesit dhe shkrimtarët e mirënjohur, Edmond Tupja e Mira Meksi, shqipërues, si dhe redaktorë të ndryshëm të shtëpive botuese në vend. Institucionet qendrore, përgjegjëse për gjuhën shqipe, me përfaqësues nga Ministria e Arsimit, Sporteve dhe Rinisë, Ministria e Kulturës dhe Autoriteti i Mediave Audiovizive marrin pjesë aktive në takim që, në shkëmbim mendimesh e përvojash mbi gjuhën sot, synon orientimin e politikave gjuhësore në vijimësi.
Çështjet rreth të cilave zhvillohet diskutimi i hapur kanë të bëjnë me shqipen dhe globalizimin; realitetin virtual, teknologjinë dhe ndikimin e medias në gjuhë; gjuhën në administratën shtetërore dhe në botimet e institucioneve publike e jopublike me karakter zyrtar; gjuhën dhe shkollën; rolin e mediave audiovizive në politikat kombëtare për gjuhën; shtrirjen e standardizimit të gjuhës jashtë Shqipërisë (përtej kufijve) dhe shqipen e sotme si gjuhë të përkthimeve dhe letërsisë artistike.
Dialogu publik për gjuhën iu është lënë ekspertëve, në një tryezë teknike dhe akademike, që vë në dukje aspekte për t’u përmirësuar e propozon zgjidhje konkrete, edhe institucionale, me zërin e atyre që punojnë përditë me gjuhën. Sot, shqipja brenda dhe jashtë kufijve përballet me sfida të qenësishme, ndaj, ruajtja, pastrimi dhe pasurimi i saj janë kërkesa të kohës.
Synimi i takimit, – veç vëmendjes ndaj sfidave të gjuhës shqipe sot dhe problematikave që e shoqërojnë atë, – është të dalë me një produkt konkret, me sugjerime të qarta, të cilat arrihen me punën e përbashkët të të gjitha departamenteve dhe ekspertëve përkatës. Materiali përfundimtar me të gjitha punimet e zgjeruara të tryezës do t’u kalohet institucioneve përgjegjëse, me sugjerimet konkrete dhe qëndrimin ndaj çështjeve të caktuara të gjuhëtarëve, përkthyesve e studiuesve të gjuhës shqipe në Shqipëri, Kosovë e Maqedoni.