Kryeministri francez Emmanuel Macron dhe kancelarja gjermane Angela Merkel i kanë kërkuar presidentit të Federatës Ruse, Vladimir Putin, që të mbështesë një rezolutë të Këshillit të Sigurimit të OKB-së për një armëpushim në Siri për t’i dhënë fund fushatave më të rrezikshme të bombardimeve të luftës.
Sipas The Guardian, përmes letrës kërkohet mbështetja e një armëpushimi 30-ditor, që do të mundësojë shpërndarjen e ndihmave në Ghouta lindore. Këshilli i Sigurimit të OKB pritet të votojë për rezolutën të premten.
Shefja e politikës së jashtme të BE, Federica Mogherini, ka kërkuar një armëpushim të menjëhershëm. Sot, avionët e forcave qeveritare dhe të aleatëve të saj goditën enklavën e dendur të populluar në lindje të kryeqytetit, bastioni i fundit rebel pranë Damaskut.
Të paktën 436 persona janë vrarë dhe qindra të plagosur, ka thënë grupi monitorues i Observatorit për të Drejtat e Njeriut në Siri. Në mesin e të vdekurve janë të paktën 99 fëmijë.