Kryesore

Ekskluzive/ Do e dorëzoni teserën e PS? Fuga: Të mbarojë edhe lufta e idealit…

12:05 - 14.03.18 Gazeta Shqiptare

Fatmira Nikolli  – Genc Fuga prej kohësh është anëtar i Partisë Socialiste. Ai e mori teserën në një nga takimet që transmetoheshin drejtpërdrejt të kryeministrit, jo pa batuta. Kohë më vonë, raporti i tij me PS-në, nuk duket i njëjti.



Fuga, ishte një prej zërave kundërshtarë sa i takon ligjit të ri për artin dhe kalimit të trupës së aktorëve nga godina e TK-së në qendër, tek ambientet e Turbinës. 1 muaj më vonë, ai është kandidat për drejtor i Teatrit Kombëtar, e me gjithë sa më lart, në takimin e ditës së hënë ku artistët qenë thirrur për t’u prezantuar projektin e godinës së re të TK-së, Fuga, nuk u thirr. Në fund të fundit, nuk qenë thirrur as zëra të tjerë kundërshtarë, si Kastriot Çipi apo Arben Derhemi, por Fuga vjen nga partia që ka formuar qeverinë.

I pyetur dje se ç’mendim ka për projektin, ai tha se: “e kam ndjekur prezantimin, nëpërmjet medias, sepse s’kam qenë pjesë e protokollit të kryeministrisë dhe të Ministrisë së Kulturës, për organizimin e këtij takimi. Unë kam 25% probalitet të jem drejtues i teatrit dhe më erdhi keq për këtë mosvëmendje. Projekti mu duk i këndshëm, por mungojnë të gjitha ambientet ndihmëse të një skenë të caktuar“.

Nga ana tjetër, Genc Fuga, shtoi se nuk e dinte se si do ishte qëndrimi i tij si aktor “nisur nga fjalia patjetër me humor e arkitektit kur tha: ne mund të shohim passkenën apo momentin ku aktorët hyjnë në skenë, madje duke parë e përshëndetur ata njerëz që kalojnë në pedonale. Ky sipas meje, është një moment që mbetet intim me aktorin, se lind një karakter“.

I pyetur nëse godina e prezantuar është e përshtatshme për një teatër kombëtar, Genci Fuga tha: “Prof.(Artan)Fuga, që unë kam xhan dhe familjar, thotë ha debat. Mos kërkoni opinione”.

I pyetur nëse si formë proteste, artistët do lënë shfaqjet, do bëjnë grevë apo do të mbajnë çfarëdo lloj organizimi tjetër kundërshtues ndaj projektit, ai tha se nuk kanë një strategji të qartë.

Më pas, “GSH”, këmbënguli të dijë, të ardhmen e raporteve të tij me PS. Pyetjes nëse pas gjithë kësaj që ka ndodhur, a do ta dorëzoje ai teserën e partisë, Fuga iu përgjigj: “Nuk mendoj që është ky diskutimi. Jam futur për një ideal të caktuar. Të mbarojë edhe lufta e idealit, pastaj pse jo. Por të shterojnë të gjitha mjetet e mia personale të luftës“.

I pyetur nga gazetarët nëse është zhgënjyer, Fuga tha se nuk do ta thoshte këtë.
Më pas, “GSH” këmbënguli të dinte nëse pas faktit që “Partia ku ju aderoni nuk ju mbështet idetë tuaja mbi teatrit; pas faktit që qeveria e krijuar prej kësaj partie, nuk ju thërret në një prezantim për projektin e një teatri ku ju synoni të jeni drejtor”, cili është qëndrimi juaj, Genci Fuga do t’i përgjigjej kështu: “Të thashë lexoj shumë. Di të bëj dallimin mes një qeverie të caktuar, partisë dhe funksioneve të veta, ndërmjet politikave afatmesme e afatgjata të origjinuara nga një forcë e caktuar politike. Në këtë mes, do shoh sektorin tim të kulturës dhe jam duke e ndjekur sektorin tim të kulturës, duke mos qenë kompetent për gjithçka. Në këtë mes përfituesi është qenia ime brenda Partisë Socialiste”.
I pyetur sërish nga “GSH”, nëse po lobon për të mirën e teatrit, Fuga tha: “Nuk po loboj për të mirën vetëm të teatrit, unë jam një person i lidhur mbi skenën, më falni po është ndërhyrje. Po loboj për veten, për të pasur një hapësirë shumë herë më të mirë, për të pasur një hapësirë jo të rrezikshme për shëndetin e për jetën, për të pasur para më tepër për t’u ballafaquar me vajzat e mia në darkë. Këto janë lëvizje të një personi anëtar të PS dhe njëkohësisht të një pedagogu, aktori e regjisori“.

Shfaq Komentet (1)

Shkruaj nje koment

Adresa juaj email s’do të bëhet publike. Fushat e domosdoshme janë shënuar me një *

* *

  1. Tre Fuga-t qe njihen publikisht,njeri filozof,tjetri regjizor,dhe i treti “Hyzmeqar”ne kryeministri,jane te ndryshem,ne daljet publike,ne deklarata,apo shkrime,por ne thelb,te tre ata i sherbejne te njenjtit “qellim”.Perpiqen ta paraqesin kete “qendrim” te pare nga kende te ndryshme,por aksonometria e tyre,eshte e njenjte (megjithese ai i vogli i Fuga-jve,nuk para del ne skene,por eshte me turbullues,si ato rrymat qe nuk duken,por krijojne turbulenca deri shkaterruese),te tre,shkojne e vijne e ngado qe rrotullohen,kthehen perseri,ne origjinen e tyre.Dhe kur e shohin ,se edhe e kane tepruar diku,merren me kucin dhe macin,e deri tek Liza e qymyrit,bile pa e njohur mire,megjithese banojne ne te njenjten lagje (te vjeter),dhe me keto perpiqen te desocialistizojne,qendrimin e tyre,qe duket qarte ,qe prej se largu,socializem i rilindur.

    Përgjigju ↓