Në lajmet tona të “show-bizz”-it, në rubrikën “nostalgji” mund të gjeni fotografi, lajme apo intervista të veçanta, të publikuara gjatë viteve në suplementin “Bluetooth” të “Gazetës Shqiptare”. Në GSH.al, sot po ju sjellim: Gratë e PS-së tani zgjedhin blunë. Zbulohet ëndrra në sirtar e Oltës
Gratë e PS-së tani zgjedhin blunë
Në diversitet me kryetaren e parlamentit, Jozefina Topalli dhe ministren e Integrimit, Majlinda Bregu, që u shfaqën numrin e kaluar këtu në suplementin tonë të veshura me të kuqe, gratë e Partisë Socialiste, për t’i sfiduar janë veshur me blu, ngjyrë në fakt që me “ligj” u takon të djathtëve. Nejse, në këtë pikë nuk ka tabu. Pikërisht kjo gjë nuk i ka penguar deputetet Valentina Leskaj dhe Mimi Kodheli të shfaqen të dyja me ngjyra blu, madje duhen komplimentuar për shijen dhe ngjyrat me jetë që kanë zgjedhur këtë herë.
Zbulohet ëndrra në sirtar e Oltës
Nuk do ta kishim marrë kurrë me mend se çfarë ëndrre do të kishte në sirtar deputetja e re e Partisë Socialiste, Olta Xhaçka. Duke qenë vajzë e re, të gjitha supozimet tona do të fokusoheshin tek jeta e saj private, apo ajo profesionale. Por në fakt, Olta ka një ëndërr krejt larg pretendimeve tona. “Të hapen kutitë!”. Po, po. Kjo është ëndrra e Oltës, të cilën ajo vetë e pohoi në emisionin “Bluetooth” në News24. Oltë e dashur, ti duhet ta kesh mësuar tashmë që jo çdo ëndërr bëhet realitet, megjithatë çdokush ka të drejtë të ëndërrojë! Ndoshta një ditë kutitë do të hapen vërtet…
Ky shkrim u botua më 3 prill 2010