Në prag të mbylljes së një banke të nivelit të dytë në qytetin e Lushnjës, 25-vjeçari Olcion Muço tentoi ta grabisë atë.
Policia thotë se i riu ka hyrë në bankë i maskuar dhe me armë. Po ashtu ai ka terrorizuar punonjësit duke qëlluar me armë, plot 8 herë. Nga të shtënat fatmirësisht nuk ka asnjë person të lënduar.
Ngjarja ka ndodhur rreth orës 16:00, në afërsi të Poliklinikës së qytetit. Policia është njoftuar nga qytetarët. 25-vjeçari ka tentuar të largohej me vrap, por nuk ia ka dalë pasi është bllokuar nga efektivët e policisë. Olcion Muço është ndaluar rreth 1 km nga vendi i ngjarjes.
Grupi hetimor sekuestroi në cilësinë e provës materiale armën me të cilën u tentua të vidhet banka, maska dhe 1 kapuç. Gjithashtu në vendngjarje u sekuestruan 8 gëzhoja pistolete TT të cilat dyshohen se janë qitur nga pistoleta e autorit.