Greqia dhe Maqedonia duket se kanë arritur një marrëveshje mbi çështjen e emrit, duke i dhënë fund një armiqësie 27 vjeçare.
Pas 27 vjet bisedimesh dhe shumë protesta, zyrtarët e dy vendeve kanë arritur të bien dakord që Maqedonia të quhet: Republika e Maqedonisë Veriore, ose Severna Makedonija në gjuhën maqedonase.
Greqia e kishte kundërshtuar emrin Maqedoni, duke iu frikësuar pretendimeve territoriale në rajonin e saj të veriut.
Ajo kishte vënë veton ndaj anëtarësisë së Maqedonisë në NATO dhe Bashkimin Evropian.
Emri i ri tani duhet të miratohet nga populli maqedonas dhe parlamenti grek.
Sipas marrëveshjes, vendi i njohur në Kombet e Bashkuara si Ish-Republika Jugosllave e Maqedonisë (Fjrom) do të quhet Severna Makedonija, ose Republika e Maqedonisë Veriore.
Gjuha e vendit do të jetë ajo maqedonase dhe qytetarët do të njihen si maqedonas (shtetas të Republikës së Maqedonisë Veriore).
Në mënyrë domethënëse, ata ranë dakord se emri i ri do të përdoret edhe në arenën ndërkombëtare, kështu që edhe 140 ose më shumë vende që njohin emrin Maqedoni gjithashtu do të duhet të miratojnë emrin Maqedoninë e Veriut.
