Tom Ndreca, anëtari i Gjykatës së Lartë, i cili ka gjykuar dosjen e “21 janarit”, nuk e ka kalauar Vettingun.
Në mbledhjen e sotme, KPK ka njoftuar sot se ai është shkarkuar nga detyra. Anëtari i Gjykatës së Lartë doli para Komisionit të Pavarur të Kualifikimit javën e kaluar, por nuk justifikoi pasurinë,
KPK, që përfaqësohet në këtë proces nga Brunilda Bekteshi, Roland Ilia dhe Firdes Shuli, thotë se deklarimi i Ndrecës është i pasaktë dhe ka mungesë të ligjshme financiare për të justifikuar 1.3 milionë lekë.
Për këtë, Ndreca ka pretenduar se nuk i janë marrë në konsideratë të ardhurat nga viti 1980 e në vijim. Ndreca deklaron një apartament 120 m2 e garazh 18 m2 në rr. Muhamet Gjollesha të blerë në 2003 me vlerën e 2 milion e 400 mijë lekë, burim për të cilin është bërë shitja e një apartament në Rrëshen.
Gjithashtu, KPK ka vlerësuar se Ndreca ka fshehur kontaktet me kunatin e tij, i cili është arrestuar në flagrancë me një sasi të vogël kanabis sativa dhe është liruar pasi nuk është provuar nga Prokuroria e Shkodrës se 6 kg e kanabisit të gjetura në banesën pas arrestimit i përkisnin atij.
Ndreca është justifikuar se nuk kishte dijeni se arrestimi me sasi të vogël kanabisi e fut një individ në botën e krimit të organizuar.
Gjyqtari Tom Ndreca u emërua në Gjykatën e Lartë në prill të vitit 2013, pas një periudhe 20 vjeçare si anëtar i Gjykatës së Apelit të Tiranës. Ai ka qenë gjithashtu anëtar i Kolegjit Zgjedhor.
Ndreca është diplomuar në Fakultetin e Shkencave Politike Juridike në degën e Drejtësisë në vitin 1980. Për një periudhë 4-vjeçare, ai ka punuar si prokuror gjyqësor dhe prokuror rrethi në Mirditë.
Analiza e pasurisë është një ndër tre shtyllat e rivlerësimit për gjyqtarët, së bashku me kontrollin e figurës dhe vlerësimin e aftësive profesionale.