Të hënën e 23 korrikut, Parlamenti do të mbyllë sesionin, duke mos pritur kështu dekretin e Presidentit të Shqipërisë, Ilir Meta, për teatrin. Afati i fundit që Presidenti të vendosë për kthimin pse jo të ligjit në Parlament është 30 korriku. Mirëpo, parlamenti do të mbyll sesionin të hënën.
Në mbledhjen e fundit të Komisionit të Ekonomisë, Nënkryetarja demokrate e Komisionit, Jorida Tabaku u shpreh se qeveria është tërhequr nga Ligji për Teatrin, duke qenë se ka vendosur të mos presë dekretin e Presidentit.
“Më në fund, qeveria i thirri mendjes, vendosi të mos presë dekretin e Presidentit dhe të mbyllë Parlamentin para se të vijë dekreti i Presidentit”, u shpreh Tabaku, e cila i kërkoi qeverisë që, me nisjen e sesionit të ri parlamentar, “pas pushimeve të gushtit, t’i thërrasë mendjes përfundimisht për ta tërhequr plotësisht ligjin e shembjes së Teatrit Kombëtar”.
Vendimi i qeverisë, për të mbyllur Parlamentin pa pritur dekretin e Presidentit vjen pas denoncimit nga opozita dhe artistët të ligjit korruptiv të teatrit, prej të cilit Edi Rama përfiton 205 milionë Euro.