Nga 800 subjekte rivlerësimi në procesin e Vettingut, 200 prej tyre kanë rezultuar të papërshtatshëm për të vazhduar detyrën.
Të paktën kështu mësohet sipas Drejtorisë së Informacionit të Klasifikuar e njohur si DSIK. E ndërsa ky informacion i konsideruar si sekret, tanimë mund të ndahet me publikun. Kjo pasi DSIK dhe Inspektoriati i Lartë i Kontrollit dhe Deklarimit të pasurisë, janë të detyruara të japin informacion mbi subjektet që i nënshtrohen Vettingut.
Këtë detyrim e ka përcaktuar Gjykata Administrative. Kjo e fundit ka vlerësuar se e dhëna statistikore mbi subjektet që kanë rezultuar të papërshtatshëm për të vazhduar detyrën, ka interes të madh për publikun dhe si e tillë duhet t’u vihet në dispozicion.
Kjo gjykatë i ka dhënë të drejtë kërkesës së Komitetit Shqiptar të Helsinkit, që i kishte kërkuar DSIK informacion statistikor për ata që kanë rezultuar si të papërshtatshëm për të vazhduar detyrat.