U deshëm plot 12 orë që policia e Tiranës të sqarojë ngjarjen e ndodhur mbrëmjen e së enjtes në kryeqytet.
Sipas njoftimit zyrtar thuhet se ngjarja ka ndodhur rreth orës 23:20 të së enjtes dhe se në pranga kanë përfunduar: Gentjan Koçi, 25 vjeç dhe Ervin Kodra, 33 vjeç, të dy banues në Tiranë.
Dy të rinjtë në rrugën “Jordan Misja”, duke lëvizur me mjetin tip “Tuareg”, i cili drejtohej nga Gentjan Koçi dhe pasagjer Ervin Kodra, nuk i janë bindur shenjës së ndalimit të shërbimit të “Forcës së Posaçme Shigjeta”.
LEXO EDHE: “Shpejtësi dhe çmenduri” në rrugët e Tiranës, dy të rinj përplasen në ndjekje nga policia
Ata mbanin me vete dy pistoleta dhe pas shenjës së efektivëve janë larguar me shpejtësi, duke u bërë burim aksidenti e duke u përplasur edhe me 4 mjete të tjera në rrugë. Shumë forca policie i kanë ndjekur nga pas dhe dy të rinjtë janë bllokuar në rrugicat e rrugës “Jordan Misja”.
Pas përplasjes me makinat e tjera, Gentjan Koçi dhe Ervin Kodra janë munduar të largohen me vrap dhe armët i kanë hedhur në oborrin e një banese.