Presidenti i Kosovës, Hashim Thaçi, nuk tërhiqet nga propozimi për korrigjimin e kufijve me Serbinë.
Duke folur në një konferencë për mediat ditën e sotme, ai tha se vetëm marrëveshja paqësore për ndryshim të kufirit në mes Kosovës dhe Serbisë, i siguron Kosovës njohjen formale nga Serbia, bashkëngjitjen e Preshevës, Medvegjës dhe Bujanovcit në territorin e Kosovës si dhe i hap rrugë të sigurt Kosovës drejt anëtarësimit në NATO, Bashkimin Evropian dhe Organizatën e Kombeve të Bashkuara.
“Dhe nuk do të ketë korrigjim të kufirit përgjatë vijave etnike, nuk do të ketë eksod të popullsisë dhe as efekt domino sa i përket stabilitetit të kësaj ane të Evropës. Po e përsëris edhe njëherë, korrigjim i kufirit në mes Kosovës dhe Serbisë, si dy shtete të pavarura të cilat do të njihnin njëra-tjetrën si shtete, do të jetë pjesë përbërëse e demarkacionit të kufirit të gjatë 430 kilometra, kurdo që do të ndodhë marrëveshja paqësore Kosovë- Serbi”, ka shtuar ndër të tjera Thaçi.
Ai shtoi se heqja e vetos ruse nga Kosova nuk mund të ndodhë pa një marrëveshje Kosovë-Serbi.
“Për të arritur këtë qëllim kam propozuar opsionin e korrigjimit të kufirit me Serbinë”, deklaroi Thaçi.
Dialogu ndërmjet Kosovës dhe Serbisë me lehtësimin e Bashkimit Evropian ka nisur më 2011 në Bruksel, dhe ka për qëllim normalizimin e raporteve midis dy shteteve.