“Arrest me burg”, kjo është masa që ka caktuar Gjykata e Shkallës së Parë në Shkodër për Safet Bajrin, i njohur ndryshe si i forti i Shkodrës.
Ai u arrestua pak ditë më parë, si pjesë e grupit kriminal “Bajri”. Bashkë me të në pranga ranë nëntë persona. Bajri mbërriti në gjykatë paraditen e sotme për tu njohur me dosjen dhe akuzat e shtetit belg. Ndërkaq, në orën 14:00 do të sillet në Tiranë për tu paraqitur në Gjykatën e Krimeve të Rënda.
Megjithëse grupi kriminal Bajri u godit, i ashtëquajturi “truri ” i tyre vijon të jetë ende në arrati. Bëhet fjalë për Enver Bajrin, 45-vjeçarin për të cilin gjithashtu gjykata e krimeve të rënda ka caktuar masën e sigurisë arrest me burg.
Sipas burimeve policore dyshohet se Enver Bajri fshihet në Belgjikë, vend ku pothuajse ka qëndruar me kohë të plotë gjatë 3-4 viteve të fundit.
Nga Belgjika dyshohet se ai kontrollonte veprimtarinë e grupit, në fushën e trafikimit të lëndëve narkotike, gjobvënies dhe aktiviteteve të tjera kriminale.
