Ka dështuar sërish pretenca ndaj Emiljano Shullazit dhe grupit të tij, të përbërë nga Gilmando Dani, Endrit Qyqja, Endrit Zela dhe Blerim Shullazi, ndërsa është shtyrë për më datë 2 tetor.
Ndërkohë, mësohet se në seancë mungonin të gjithë të pandehurit, si dhe një nga avokatët. Blerim Shullazi ka kërkuar që ta përfaqësojë avokati Aldo Tabaku, por vetë ky i fundit ka kërkuar shtyrje të pretencës për probleme personale.
Avokatët e kanë justifikuar kërkesën për shtyrje të kolegut të tyre Aldo Tabakut si humane.
Nga ana tjetër, Prokuroria e ka quajtur një gjë të tillë të qëllimshme.
Ndërkaq, trupa e prokurorëve përbëhet nga; Donika Prela, që është drejtuesja e Krimeve të Rënda, Besnik Muçi, Anton Martini dhe Gent Osmani.
Muçi dhe Osmani janë emrat e rinj të dy prokurorëve që marrin përsipër këtë çështje.
“Blindohet” Gjykata e Krimeve të Rënda
Gazeta Shqiptare mëson se e gjithë policia, forcat speciale, FNSH me armatim të rëndë ka zbarkuar dhe ka rrethuar institucionin dhe zonën përreth.
Seanca është parashikuar të nisë në orën 9:00 ndërsa shteti përfaqësohet nga një grup prokurorësh të Krimeve të Rënda, në krye të të cilëve është vetë drejtuesja Donika Prela. Gjithashtu është edhe zëvendësi i saj, Gentian Osmani. Ndërsa emrat e dy prokurorëve të tjerë pritet të bëhen publikë në nisje të seancës.
Në bankën e të akuzuarve janë Emiljano Shullazi, Gilmando Dani, Endrit Qyqja, Endrit Zela dhe Blerim Shullazi.
Dosja e Shullazit futi në kaos prokurorinë e Krimeve të Rënda, pasi refuzuan hedhjen e shortit për të gjykuar këtë çështje pas largimit të Elisabeta Imerajt, që u emërua drejtuese e prokurorisë në Tiranë dhe Eneid Nakucit me pretendimin se është sëmurë.
Kujtojmë këtu se për këtë çështje një ditë më parë reagoi edhe ambasada Amerikane.