Zyrtarët turq që po hetojnë zhdukjen e gazetarit saudit Jamal Khashoggi, do të kontrollojnë konsullatën e Arabisë Saudite në Stamboll më vonë këtë të hënë, sipas njoftimeve.
Zyrtarët turq besojnë se Khashoggi u vra në konsullatë nga agjentët sauditë, gati dy javë më parë, por Riadi e ka mohuar këtë.
Presionet diplomatike po shtohen ndaj Arabisë Saudite, duke e detyruar për të dhënë një shpjegim më të plotë.
Të hënën, mbreti Salman i Arabisë Saudite urdhëroi një hetim mbi rastin.
“Mbreti ka urdhëruar prokurorin publik të nis një hetim të brendshëm mbi çështjen Khashoggi bazuar në informacionin e ekipit të përbashkët në Stamboll”, tha një zyrtar i cituar nga agjencia e lajmeve Reuters.
Javën e kaluar, Turqia pranoi një propozim nga Arabia Saudite për të formuar një grup të përbashkët pune, për të hetuar zhdukjen e Khashoggi.
Masat e fundit vijnë pasi shumë figura kryesore të biznesit thonë se nuk do të marrin pjesë në një konferencë të rëndësishme investimi në Riad, më vonë këtë muaj.