Vetëm pak muaj më parë moderatori i njohur dhe i dashur për publikun shqiptar, Ardit Gjebrea, njoftoi me dhimbje ndarjen nga jeta të nënës së tij.
Padyshim ai e kujton në çdo moment dhe ngurron të shprehet për të as para kamerave, siç ka ndodhur edhe gjatë emisionit të sotëm.
Në rubrikën “Kam një mesazh për ty”, Arditi u bë dëshmitar i një përqafimi të ngrohtë mes një nëne dhe vajzës në studio dhe nuk e fshehu dot faktin se u ndje xheloz për këtë përqafim.
“Të kam zili që përqafove mamin. Nuk e kanë të gjithë këtë fat”, u shpreh Arditi.
Rastësisht gjyshja e vajzës, e cila ishte e ftuara e rradhës, kishte qenë mikeshë e të ndjerës, pasi kishin punuar në të njëjtin profesion.
“Unë kam qenë shoqe me mamanë tuaj se ka qënë arsimtare. Dhe më kujtohen fjalët që ju thatë, a do të mësohemi dot me mungesën e njerëzve që nuk janë më”, tha gjyshja.
Teksa Arditi shtoi: “Është e vështirë të mësohesh dhe besoj se nuk do të mësohesh kurrë dhe dhimbja do të jetë aty. Por familja ime, bashkëshortja, vajza e djali si dhe familja e madhe e së dielës ma lehtësojnë dhimbjen që kam, sepse unë nuk kam më në jetë as nënën e as babin”.