Sport

Roma merr kreun në Rusi, Valencia “shkatërron” Young Boys

21:08 - 07.11.18 Gazeta Shqiptare

Roma ka hedhur një hap të sigurtë në fazën e 1/16-ave të Uefa Champions League. Italianët mposhtën me rezultatin e ngushtë 2-1 CSKA Moskë, duke marrë kreun e grupit G me 9 pikë. Manolas i dha avantazhin verdhekuqve pas 4 minutash lojë, teksa devijoi saktë me kokë një krosim nga këndi.

Reagimi i rusëve erdhi vetëm në fraksionin e dytë, me Sigurdsson që lëvizi mirë në zonë për të mposhtur më pas Olsen. Megjithatë, dalje me të kuq e mbrojtësit Magnusson krijoi hapësira në prapavijën ruse, fakt që u shfrytëzua në maksimum nga miqtë. I shërbyer nga Edin Dzeko, Lorenzo Pellegrini e kishte të lehtë të shënonte, duke i dhënë 3 pikë të rëndësishme Romës që pret e qetë takimin e Çekisë, mes Plzen dhe Realit të Madridit.

Në takimin tjetër të zhvilluar në orën 18:55, Valencia mposhti pa probleme Young Boys. Spanjollët fituan me shifrat 3-1 dhe ngjiten përkohësisht në vendin e dytë në grupin H. Ndërkohë zvicerianët janë me një këmbë jashtë Championsit, pasi mbajnë vendin e fundit me 1 pikë. Takimi i vlefshëm për këtë grup është ai mes kryesuesve të Juventusit dhe Manchester United të vendit të tretë.

Shfaq Komentet (0)

Shkruaj nje koment

Adresa juaj email s’do të bëhet publike. Fushat e domosdoshme janë shënuar me një *

* *