Ish-kryeministri, Sali Berisha, pas përfundimit të homazheve në Akademinë e Shkencave për mbërritjen e eshtrave të Mid’hat Frashërit në Shqipëri, ka bërë të ditur se ky burrë i madh i dha Shqipërisë gjithçka kishte më të shtrenjtë.
“Sot Kombi shqiptar përulet me nderimin më të madh para pasardhësit të frashëllinjve të pavdekshëm dhe para njërit prej personaliteteve më të shquar të botes shqiptare dhe të mendimit politik e shkencor. Bashkëkryesoi kongresin e alfabetit, vuri firmën në aktin themeltar të shtetit të shpalljes së pavarësisë.
Një studiues apasionant i madh i gjuhës, themelues i nacionalizmit qytetar shqiptar.
Drejtues i ballit kombëtar, promotor i luftë së shqiptarëve për liri.
Pavarësisht se historia nuk ka qenë e drejtë për Frashërin ai vjen e pushon në dheun e tij, vjen dhe pushon i nderuar nga mbarë shqiptarë. Ata që urdhëruan eleminimin e tij fizik kanë përfunduar në koshin e plehrave të historisë së Kombit Shqiptar, është fjala për Enver Hoxhën”, u shpreh Berisha.