Tashmë është pranuar edhe nga Policia e Shtetit se ish-Kryeministri maqedonas Nikola Gruevski është larguar në hungari përmes Shqipërisë, për t’i shpëtuar urdhër-arrestit që rëndon ndaj tij.
Por analisti Lorenc Vangjeli, nga studio e emisionit “Opinion” ka thënë këtë të enjte se Gruevski ka hyrë në Shqipëri përmes Bashkisë së Pustecit për t’u larguar më pas për në Mal të Zi nga dogana e Hanin të Hotit në Shkodër.
“Gruevski ka kaluar përmes doganës së Prespës, nga Bashkia e Pustecit” tha mes të tjerave Vangjeli
Kujtojmë se Bashkia e Pustecit, është një bashki ku pjesa më e madhe e banorëve është minoritet maqedonas.
Ndërkohë Gruevski vijon të jetë në Hungari ku ka kërkuar azil politik pas vendimit për 2 vite burg të marrë nga Gjykata Penale e Shkupit. Sipas Policisë së Shtetit shqiptar, dyshohet se ai është larguar përmes vendit tonë me një makinë diplomatike të ambasadës hungareze.
