Situata e rëndë kriminale që ka përfshirë kohët e fundit qytetin e Shkodrës, ka ngjallur ankth dhe panik mes qytetarëve.
Një mesazh të fortë ka dhënë këtë të premte edhe Myftiu i Shkodrës Muhamed Sytari.
Gjatë fjalës së tij në 28-vjetorin e rihapjes se xhamisë së Plumbit në Shkodër dhe në ditën e inaugurimit të xhamisë tek ura e Bunës, Myftiu Sytari tha se sot Shkodra është zhytur në një situatë të errët, ku krimi e korrupsioni kanë përfshirë Shkodrën. Më tej imami u lut që kjo situatë të ndryshojë.
“Sot kur Shkodra është zhytur nga një mjegullnaje e zymtë, kur era e krimit, e korrupsionit, vjedhja, shthurjes, përhapja e fajdeve, gënjeshtrave dhe pabesisë, tendencave përherë të denigrimit të rinisë, kanë për qëllim të bëjnë ligjin e t’i ndryshojnë identitetin këtij vendi, ne e kemi për borxh moral, fetar e kombëtar të kthehemi nga vlerat e besimit. Larg besimit dhe vlerave të tij, ky vend nuk ka të ardhme”, u shpreh imam ai.
Kujtojmë se dy ditë më parë në lagjen Rus të Shkodrës u vra Fatos Ferracaku dhe u plagos shoku i tij Fatmir Mehaj.