Me trokitjen e festave, qytetet duket se po ndryshojnë. Vendosja e ndriçimit apo dhe zbukurimet e tjera, nisur nga kryeqyteti dhe qytetet e tjera, kanë sjellë një tjetër atmosferë. Por sa kushtojnë këto ndryshime?
Nga një studim në faqen e Agjencisë së Prokurimit Publik dalin shifra të larta që janë shpenzuar për blerjen e zbukurimeve, dritave apo dhe fishekzjarrëve.
Kështu Bashkia e Korçës ka shpenzuar plot 800 mijë lekë të reja, për blerje “shirita festivë”. Bashkia e Fierit duket tejet entuziaste për festat duke hapur thesin. Kjo bashki e drejtuar nga Armando Subashi ka harxhuar mbi 2,5 milionë lekë për blerje materiale dekori për festat e fund vitit 2018.
Bashkia e Shkodrës ka harxhuar 330 mijë lekë për fishekzjarrë, dhe 199 mijë lekë për blerjen e dhuratave. Bashkia e Pogradecit ka shpenzuar 167 mijë lekë për zbukurimet, ndërsa Bashkia e Roskovecit ka shpenzuar 356 mijë lekë për të njëjtën arsye. Në Devoll, bashkia ka shpenzuar 580 mijë lekë për zbukurime.