Kryeministrja britanike, Theresa May, është kthyer me “duar bosh” nga takimi me udhëheqësit e lartë të BE-së në Bruksel, teksa shpresonte të siguronte koncensione mbi kufirin me Irlandë.
Përballë saj, shumica e kabinetit ministror kërkon mbajtjen e një referendumi të dytë, pasi mendon se plani i saj për “Brexit” i përngjan një qenieje të ngordhur në ujë.
May shpresonte të siguronte koncensione gjatë takimeve në samitin e BE-së, sidomos për mekanizmin për pengimin e një kontrolli të mirëfillte kufitar mes Irlandës së Veriut, pjesë e Britanisë, dhe Republikës së Irlandës, anëtare e BE-së.
Por, udhëheqësit europianë ishin të qartë se nuk do të kishte rinegocim.
Ish-kryeministri britanik Tony Blair u kërkoi udhëheqësve të BE-së dhe zonjës May të shtynte afatin e hyrjes në fuqi të “Nenit 50” për tërheqjen nga BE-ja, me qëllim që të votohej sërish nga publiku britanik për të zgjidhur ngërçin për “Brexit”-in.
Disa orë më pas, edhe udhëheqësi më i spikatur euroskeptik, “babai i Brexit-it” Nigel Farage deklaroi se besonte që Britania mund të përballej me një referendum të dytë.
Ai u kërkoi mbështetësve të tij të përgatiteshin për çdo skenar.
Situata politike në Britani mbetet konfuze dhe askush nuk di të thotë me siguri sesi do të precipitojnë zhvillimet.