Edi Rama nuk lëviz nga pozicioni i tij, pavarësisht se kërkon dialog me studentët. Nga mbledhja e grupit parlamentar të PS-së është vendosur që këtë javë të ketë dy seanca, ku të enjten veç nismave të tjera do të rrëzohet dhe dekreti i presidentit Ilir Metës për buxhetin.
Ndërsa të premten seancë e posaçme vetëm për vetting-un në politikë.
Po ashtu mësohet se disa deputetë kanë pasur ankesa për pjesëmarrjen e ministrave në komisione dhe kryeministri Edi Rama i ka dhënë të drejtë.
Të enjten që shkoi Ilir Meta u bë presidenti i parë që ktheu një ligj për buxhetin, duke iu referuar kërkesave të studentëve që duan rritjen e buxhetit të arsimit në 5%. Presidenti tha se me këtë lëvizje synonte garantimin e stabilitetit në vend dhe shprehte besimin e plotë se Kuvendi do të reflektonte me qëllim plotësimin e kërkesave të studentëve.
