Partia Demokratike ka dalë me dokumente, për të denoncuar arsyen e dëbimit të banorëve të Unazës së Re, të cilët preken nga Unaza e Madhe.
Deputetja Jorida Tabaku dhe këshilltari ligjor i PD, Gazment Bardhi deklaruan se banorët u dëbuan, për ti hapur rrugë ndërtimit të një projekti rezidencial luksoz të “trafikantit Edmond Bego”.
Sipas PD, kompania “Alsion Albania” e Edmond Begos do të ndërtojë tek ish-serat një projekt me vlerë 60 milionë euro.
Tabaku tha se vendndodhja është buzë Unazës së Madhe dhe parashikohet ndërtimi i një projekti rezidencial luksoz.
“Partia Demokratike publikon sot fakte tronditëse sesi Rama dhe Veliaj kanë bashkëpunuar për një projekt tjetër korruptiv me trafikantin ndërkombëtar të drogës Edmond Bego, i njohur si miku i Taulant Ballës. Edmond Bego ka parashikuar të ndërtojë një kompleks rezidencial luksoz tek zona e Unazës së Madhe. Për llogari të këtij projekti të trafikantit të drogës, Edi Rama dhe Erion Veliaj: kanë ndryshuar Planin Urbanistik të Tiranës, kanë ndryshuar rrjedhën e lumit Lanë në favor të projektit luksoz të trafikantit të drogës. Kanë planifikuar dëbimin nga shtëpitë të të paktën 200 familjeve për të mbajtur të paprekur pronën e Edmond Begos,” tha mes të tjerave Tabaku.