Franca thirri në bisedë informative ambasadoren e Italisë, pasi zëvendëskryeministri italian i akuzoi francezët për shfrytëzimin e Afrikës dhe nxitjen e migrimit.
Ditën e diel, Luigi di Maio i bëri thirrje Bashkimit Evropian që të sanksionojë Francën për politikat e saj në Afrikë.
Ai tha se Franca “nuk ka ndaluar kurrë kolonizimin e dhjetëra shteteve afrikane”.
Di Maio shtoi se nëse nuk do të ishte Afrika, Franca do të renditej e 15-ta në mesin e ekonomive botërore, e jo në mesin e gjashtë të parave.
Vazhdimisht qeveria italiane është “ndeshur” me Francën gjatë muajve të fundit për çështje të tilla si: emigracioni, protestat dhe kultura.
Kur Franca kritikoi Italinë për mos lejimin e anijeve me emigrantë të ankoroheshin në brigjet e saj, zyrtarët italianë iu përgjigjën duke akuzuar vetë Francën se refuzoi të pranonte emigrantë.
Ministri i Brendshëm, Matteo Salvini, këtë muaj deklaroi se Franca po strehonte një numër “terroristësh që kishin vrarë në Itali”.
Di Maio u bashkua me kauzën e “jelekverdhëve” të Francës, duke u bërë thirrje atyre të mos heqin dorë dhe u ofroi atyre “mbështetjen që ju nevojitet”.
Këtë deklaratë e ai e bëri gjatë një vizite në Italinë qendrore në fundjavë, pikërisht kur OKB-ja tha se rreth 170 emigrantë dyshohet se ishin mbytur në dy anije në detin Mesdhe.