Kryeministri Rama ka marrë zyrtarisht edhe detyrën e ministrit të Jashtëm, duke u betuar në presidencë.
Kreu i qeverisë dhe Presidenti Meta shtrënguan duart pas një krisjeje institucionale, e cila do të zgjasë deri në plotësimin e vendeve vakante të Gjykatës Kushtetuese.
Betimi është bërë pa praninë e medias.
Rama ka thënë se ishte i detyruar të merrte përsipër postin e ministrit të Jashtëm, në kushtet kur, sipas tij, Presidenti Meta ka shkelur Kushtetutën.
Kreu i shtetit refuzoi propozimin e parë të Ramës, duke mos dekretuar Gent Cakajn si ministër të Jashtëm, teksa renditi edhe arsyet që e çuan drejt këtij vendimi.
Kjo lloj përplasjeje, mes dy prej institucioneve më të rëndësishme në vend, është e para në llojin e saj.
Më herët, edhe në rastin e ministrit Sandër Lleshaj, Presidenti refuzoi ta dekretojë me herën e parë.
Njoftimi i Presidencës:
Në Institucionin e Presidentit të Republikës u zhvillua ceremonia e betimit të Ministrit të ri për Evropën dhe Punët e Jashtme.
Pas ekzekutimit të himnit kombëtar dhe leximit të dekretit përkatës, Ministri për Evropën dhe Punët e Jashtme, e njëkohësisht Kryeministër, Edi Rama, u betua sonte, duke vendosur dorën mbi Kushtetutën e Shqipërisë.
Presidenti i Republikës, Ilir Meta, duke i dorëzuar dekretin, i uroi suksese në këtë detyrë shumë të rëndësishme. Në ceremoni ishte i pranishëm Kryetari i Grupit Parlamentar të Partisë Socialiste, Taulant Balla dhe anëtarë të Kabinetit të Presidentit të Republikës