Në lajmet tona të “show-bizz”-it, në rubrikën “nostalgji” mund të gjeni fotografi, lajme apo intervista të veçanta, të publikuara gjatë viteve në suplementin “Bluetooth” të “Gazetës Shqiptare”. Në GSH.al, sot po ju sjellim: Fotot jo zyrtare dhe të pathënat e dasmës së Edi Ramës
Edi: Linda, më puth në buzë
Më e komentuara nga të gjitha fotot, ka qenë ajo e puthjes së Edit dhe Lindës. Ne që ishim aty dhe e pamë nga afër, e dëgjuam shumë mirë Olsin ndërsa i kërkonte Lindës dhe Edit që të putheshin në buzë. E sigurisht, pas vendosjes së unazave, Linda është drejtuar drejt bashkëshortit për ta përqafuar. Por ashtu sikurse e shihni shumë mirë në foton e parë, është pikërisht gishti i Edit që i tregon Lindës se nuk bëhet fjalë thjesht dhe vetëm për një përqafim. Bëhet fjalë për një puthje në buzë të çiftit. Mes të qeshurave dhe duartrokitjeve, dhe Linda, i është dorëzuar kërkesës së bashkëshortit të saj, duke i dhënë një puthje të zjarrtë prej disa sekondash.
Alketa Vejsiu, në rolin e regjisores
Një ndër personat e veçantë në dasmë, që siç u pa nuk ishte thjesht në rolin e një mikeshe që duhet të shijonte e të shikonte këtë ceremoni, ishte edhe Alketa Vejsiu, e shoqëruar nga bashkëshorti. E veshur shumë shik, Alketa disa herë është parë në rolin e regjisores, edhe pse në krah të saj ishte edhe Vera Grabocka. Kishte momente kur Alketa i sugjeronte çiftit se çfarë duhet të bënte dhe kur duhet të fillonte ceremonia. T’i jetë besuar vallë vajzës showgirl një event i tillë i një dasme me rreth 800 të ftuar? Ne të Bluetooth e zbuluam se “po”, kjo ishte e vërtetë.
Çifti Rama, foto me kamerierët
Edi Rama e ka zhveshur veten nga të qenit kryetar i PS dhe kryetar i Bashkisë. Në ceremoninë e tij martesore te ‘Xibraku’ përveç fotografive të kortezisë me të gjithë VIP-at që ishin aty brenda, Edi dhe Linda Rama nuk kanë harruar të bëjnë një foto me të gjithë personelin që shërbeu për mbi 800 të ftuarit në lokalin, i cili ishte i mbushur si brenda dhe jashtë plot e përplot me njerëz.
LEXO EDHE: Detajet e dasmës 30 mijë euro të Edi Ramës me Lindën
Sigurisht, edhe shefat e kuzhinës që kanë bërë ushqimet, (në fakt shumë pak veta shijuan ushqimet e Xibrakut, pasi e kishin konsumuar drekën), por edhe kamerierët, u kënaqën së tepërmi ndërsa çifti VIP ka bërë së bashku me ta një foto.
Fatos &Dori Klosi, bashkë tek Edi Rama
Fatos dhe Dorina Klosi kanë kohë që nuk janë më bashkë. Por ja tek i shohim te kjo foto. Në ceremoninë e dasmës së Edi Ramës me Linda Bashën, ata janë duke shkuar së bashku. Nuk e dimë nëse çifti është kthyer për të jetuar së bashku, por ndërkaq, edhe nëse është ndryshe, ashtu sikuse duket nga foto bëhet shumë e qartë që ata kanë mbetur miq të mirë. Dori dhe Fatos Klosi kanë edhe një vajzë me njëri tjetrin. Edhe pse me cilësi të dobët të fotove, duket se Dori Klosi është veshur shumë shik, një veshje e me të zeza por me një çantë ngjyrë floriri. Dhe gjatë gjithë mbrëmjes, ata kanë qëndruar së bashku.
Gazetarët i puthin duart Janullatosit
Një nga të ftuarit VIP në ceremoninë e dasmës së liderit të PS, ishte kryepeshkopi Anastas Janullatos. Sigurisht, rreth tij janë mbledhur shumë të ftuar. Menjëherë pas vendosjes së unazave në gisht për çiftin, edhe vetë ai i ka bekuar duke i takuar e përqafuar. Por nuk ka qenë vetëm çifti që ka kërkuar të takohet me Janullatosin. Sikurse po e shihni në këto foto, Janullatos ka uruar edhe vëllain e Edit, Olsin, për martesën e kreut socialist. Edhe pse ishte vëllai i vogël, Olsi i ka pranuar urimet. Por se mos vetëm Olsi. Pranë Janullatosit, është afruar edhe editorialisti Lorenc Vangjeli, që përveçse e ka takuar kryepeshkopin, publikisht i ka puthur atij edhe dorën, në shenjë respekti. Ka afruar aty edhe shoqëruesen e tij në këtë aktivitet. E menjëherë grupit i është bashkuar edhe gazetarja Ilva Tare. Pas çiftit Rama, i vetmi njeri që është takuar me më shumë njerëz, ka qenë Anastas Janullatos.
Berisha, një orkide të egër për Edi Ramën
Orkide të egër për njeriun e opozitës që më në fund po martohet. Kjo është filozofia e kryeministrit Berisha, që i dërgon Edi Ramës lule të bardha mes të cilave kjo orkide, pikërisht në dasmën e tij, në koktejin e organizuar të dielën e kaluar te ‘Xibraku’. Edhe pse të bardha, nuk duket se janë lule paqeje, janë lule për të treguar se ai, Berisha, edhe pse nuk është në ceremoninë e dasmës, ekziston diku dhe vazhdon të jetë në postin e kryeministrit, post aq shumë i dëshirueshëm për socialistët. Lulet i ka dërguar për qejf, edhe pse Rama nuk u kujtua një javë më parë, pra më 15 tetor, t’i dërgonte lule me rastin e 66- vjetorit të kryeministrit. Po nuk duket se Rama, nuk do të ketë rast për t’i çuar lule Berishës, se ky i fundit nuk ka ndërmend të martohet më.
Gregu & Rea, miq para e pas dasme
Dhe pasi gjithë koktejli ka mbaruar, jo në orën 18.30 siç ishte shkruar në festën e dasmës, më të kënaqurit e kësaj dasme, kanë qenë fëmijët e çiftit dhe shokët e tyre përkatës. Janë ulur në njërën nga shkallët brenda sallës së boshatisur, ndërkaq, i kanë kërkuar Olsit, vëllait të Edi Ramës, që t’u bëjë atyre një foto të ulur në shkallë, por tejet, tejet të lodhur. Ajo që të binte në sy, pothuaj gjatë gjithë ceremonisë, ishte fakti se djali i Edit, Gregori, dhe vajza e Lindës Rea, ishin shumë miq me njëri tjetrin. Dhe kjo u pa edhe nga dashuria dhe puthjet entuziazmuese që fëmijët u dhanë jo vetëm prindërve të tyre, por edhe vetë ata me njëri tjetrin.
Mungesa e madhe me emrin Anri
Ore çun pse nuk ishe në dasmën e shokut? Ti duhet të jesh i gëzuar i pari se shoku po të martohet me njeriun që i do zemra atij. Apo ai nuk të mori mendim? Hë si thua? Ku është dhurata e jote? Apo do të jetë një nga ato surprizat artistike që vetëm artistët e vërtetë bëjnë? Kjo ishte pikëpyetja e madhe e miqve të Edi Ramës, që kërkonin në mesin e qindra të ftuarve mikun e tij më të ngushtë Anri Salën. Sigurisht që nga Parisi erdhi Liri Begeja për t’i martuar, pra gjithsesi një lidhje franceze, vendi që i lidhi aq shumë këto dy shqiptarë. Por, mungesa quhet mungesë dhe ajo e Anrit është me M të madhe, dhe shtypi biles.
Gregori, i emocionuar në dasmën e babait
Po rriten gjithnjë e më shumë numri i atyre fëmijëve që do të thonë më vonë, kur të rriten se “kam qenë në dasmën e prindërve”. Kjo vlen edhe për Gregorin, djalin e Edi Ramës, që u paraqit në dasmën e të atit, i emocionuar për këtë ditë të veçantë. Në hyrje ishte paksa i emocionuar, pastaj gjatë gjithë kohës me buzën në gaz për një ngjarje të tillë. Më në fund një dasmë madhështore në shtëpinë e Ramës. Këtë do të mbajë mend Gregori për gjatë gjithë jetës së tij. Duket se edhe nusja i ka pëlqyer sepse duket i gëzuar në fotot e dala me Linda Bashën.
Ky shkrim u botua më 30 Tetor 2010
