Marrëveshja e Prespës dhe ndryshimet kushtetuese kanë hyrë në fuqi dhe prej mbrëmjes së djeshme vendi quhet Republika e Maqedonisë së Veriut.
“Njoftojmë se janë plotësuar kushtet për hyrjen në fuqi të amendamenteve të Kushtetutës se Maqedonisë së Veriut dhe ligjit kushtetues për implementimin e amendamenteve të Kushtetutës të Republikës se Maqedonisë, të cilat Kuvendi i Republikës i miratoi më 11 janar 2019. Po ato hyjnë në fuqi sot, me 12 shkurt, pas shpalljes në Gazetën Zyrtare”, thuhet në deklaratën e Qeverisë.
Në këtë mënyrë fillon implementimi i detyrimeve që dalin nga Marrëveshja e Prespës dhe amendamentet kushtetuese.
Emri i ri është shënuar edhe në faqen zyrtare të Qeverisë, ndërsa në ditën në vijim do të fillojë edhe procesi i ndryshimit të emrit në tabela dhe mbishkrime institucionale, pika kufitare dhe detyrimet e tjera të parapara me Marrëveshjen e Prespës.
