Një koalicion i 16 shteteve amerikane të udhëhequr nga Kalifornia janë bashkuar për të paditur administratën e Presidentit Donald Trump, mbi vendimin e tij për të shpallur gjendjen e jashtëzakonshme në kufirin me Meksikën.
Në deklaratën e tyre, shtetet kanë cilësuar se kërkojnë të bllokojnë “keqpërdorimin e pushtetit presidencial”.
Kjo lëvizje vjen vetëm pak ditë pasi Trump aktivizoi kompetencat e jashtëzakonshme me qëllimin të anashkalonte Kongresin e te siguronte kësisoj financimin e projektit, një premtim qendror i bërë gjatë fushatës.
Trump njoftoi planin e tij pasi kongresi i refuzoi fondet për ndërtimin e murit.
Koalicioni i 16 shteteve argumenton se urdhri i tij për të devijuar fondet do t’i kushtoje atyre miliona dollarë, duke i dëmtuar ekonomitë.
Ligjvënësi demokrat Adam Schiff, kryetar i komisionit të Zbulimit në Dhomën e Përfaqësuesve deklaroi se qëndresa në këtë rast është e domosdoshme.
Por, Trump tha se nuk kishte nevojë të deklaronte gjendjen e emergjencës, por e kishte bërë këtë me shpresën e sigurimit sa më shpejt të fondeve për murin.
