Një përmbysje monumentale, një përmbysje e kërkuar dhe e arritur. Një klimë e jashtëzakonshme në “Allianz Stadium”, një klimë e përgatitur nga klubi torinez ditë më parë, duke karikuar ambientin me moton “get ready to comeback”, çka u realizua falë një Kristiano Ronaldo të përbindshëm. Është pikërisht portugezi ai që çel rezultatin në pjesën e parë, kur me kokë mposht Oblak në shtyllën e dytë pas harkimit të topit nga Bernardeski.
Por CR7 nuk do të ndalet me kaq, pasi do të vrapojë si i çmendur gjatë gjithë takimit, ndërsa me fillimin e pjesës së dytë, sërish me kokë, sërish në shtyllën e dytë, mposht Oblak, që arrin te topi, por pasi sfera kishte kaluar vijën. 2-0, çdo gjë është e barbartë. Spinacola asfalton krahun e majtë, Emre çan vë rregull në mesfushë ndërsa Bernardeski është i papërmbajtshëm. Sikundër në minutën e 83-të, kur me një sprint të fuqishëm futet ne zonë dhe detyron mbrojtësin t’i shkaktojë faull. Nga pika e bardhë sërish CR7, është mbrëmja e tij, nuk mund të gabojë. Oblak nga e majta e topi në të djathtë të portierit, 3-0, përmbysja është servirur në një pjatë të argjendtë, Juventusi kalon në çerekfinale, Atletiko është jashtë!
