Letërsia shqipe do të jetë e pranishme në Panairin e Librit në Lajpcig nga data 21 deri 24 mars. Një program i pasur takimesh të organizuara në stendën e Ministrisë së Kulturës, në stendën e rrjetit ‘TRADUKI’, si dhe në hapësira të tjera të panairit dhe jashtë tij. Dy autorë të ftuar nga Ministria e Kulturës: Lisandri Kola dhe Saimir Muzhaka; dy autore dhe përkthyese të ftuara nga rrjeti ‘TRADUKI’ dhe rezidenca e përkthyesve në Berlin: Lindita Arapi dhe Anrila Spahia (Ana Kove). Është kthyer në traditë tashmë dhe paraqitja e katalogut në anglisht me veprat më të suksesshme të një viti më parë, të cilin Ministria e Kulturës e propozon për shtëpitë e huaja botuese. Në katalog janë përfshirë veprat dhe autorët që kanë fituar çmimet më të rëndësishme të vitit 2018. Henrik S.G. me “Sonatë për gruan e një tjetri” – Çmimi Kombëtar i Letërsisë, akorduar nga Ministria e Kulturës së Shqipërisë;
Ardian Kyçyku me “Ati” – Çmimi i Autorit të Vitit nga Akademia “Kult”. Virgjil Muçi me “Piramida e shpirtrave” – Çmimi “Kadare” nga Fondacioni “MAPO”, Brajan Sukaj me “Ciklopi” – Çmimi për krijimtarinë më të mirë të vitit akorduar nga Shoqata e Botuesve shqiptarë. Mitrush Kuteli (in memoriam) me “Përralla të moçme shqiptare” – Çmimi i Bibliofilisë, akorduar nga Biblioteka Kombëtare e Shqipërisë. Janë përfshirë gjithashtu në këtë katalog shkrimtarët më të suksesshëm për vitin 2018 me botimet e tyre jashtë vendit: Ridvan Dibra, i nominuar për Çmimin Ballkanika me romanin “Legjenda e vetmisë”. Gjithashtu ky roman i përkthyer në frëngjisht nga përkthyesja Evelyne Noygues dhe i botuar nga shtëpia botuese “Le Ver à Soie” është përzgjedhur në 5 librat më të mirë për Çmimin e përkthimit të vitit në Francë. Luljeta Lleshanaku, libri i së cilës “Negative space”, i përkthyer në anglisht nga Ani Gjika, është botuar në Angli nga “Bloodaxe Books” dhe në Amerikë nga “New Direction”. Libri është ishte gjithashtu i përzgjedhur në 5 librat më të mirë për “PEN Literary Award for Poetry in Translation”. Për herë të parë në katalogun e autorëve janë përfshirë edhe dy përkthyeset më të suksesshme të vitit për përkthimet nga gjuha shqipe: Ani Gjika, përkthyesja e librit të Luljeta Lleshanakut “Negative space”, finaliste për “PEN Literary Award for Poetry in Translation”, Evelyne Noygues, gjithashtu finaliste për Çmimin e përkthimit më të mirë në Francë. Takimi më i rëndësishëm në stendën e Ministrisë së Kulturës do të jetë të premten më datë 22 mars, ora 16.30 me temë: “Përkthimi, thembra e Akilit e letërsisë shqipe”. Të ftuar për të diskutuar në panel Lisandri Kola, Anrila Spahia dhe Mimoza Hysa.