Sipas Raportit më të ri për Lumturinë në Botë, të publikuar nga Rrjeti për Zgjidhje të Qëndrueshme Zhvillimore në kuadër të OKB-së, Shqipëria renditet e fundit në rajon.
Raporti i lumturisë botërore është një studim historik i gjendjes së lumturisë globale që i rendit 156 vende, nisur nga fakti se sa të lumtur janë qytetarët e tyre.
Shqipëria renditet në vendin e 107-të, teksa Kosova renditet në vendin e 46. Serbia në vendin e 70-të, Mali i Zi në vendin e 73, Kroacia në vendin e 75, Bosnje dhe Hercegovina në vendin e 78 dhe Maqedonia në vendin e 84.
Raporti i sivjetshëm i lumturisë fokusohet në lumturinë dhe komunitetin: se si lumturia ka evoluar gjatë dhjetëra viteve të fundit, me fokus në teknologjitë, normat shoqërore, konfliktet dhe politikat qeveritare që i kanë nxitur këto ndryshime.
Sondazhet janë bërë për periudhën ndërmjet viteve 2016-2018.
Finlanda përsëri është e para, si vendi më i lumtur në botë. Dhjetë vendet tjera që janë renditur vazhdimisht në mesin e më të lumturve janë : Danimarka, Norvegjia, Islanda, Holanda, Zvicra, Suedia, Zelanda e Re, Kanadaja dhe Austria. SHBA-ja u rendit në vendin e 19-të duke rënë një vend nga viti i kaluar.
Ndërkaq në fund të listës së vendeve më pak të lumtura gjenden: Afganistani në vendin e 154, Republika e Afrikës Qëndrore në vendin e 155 dhe Sudani Jugor renditet në vendin e 156-të .
Pikërisht sot, më 20 mars, është edhe Dita Ndërkombëtare e Lumturisë.
